聖誕節三大科幻電影出爐 即刻送上掃雷速報

聖誕節三大科幻電影出爐 即刻送上掃雷速報

相關信用卡:

聖誕節三大科幻電影出爐 即刻送上掃雷速報

發表日期: 2016 年 12 月 24 日 更新日期: 2016 年 12 月 24 日 生活

作者:Arthur

各位好!! 又係週末好Hea處時間啦! 上個星期介紹嘅燒烤,唔知大家又有冇去呢? 早幾個禮拜有玩又食,應該都有啲攰啦啩。今個星期係時侯同大家講返啲靜態少少嘅嘢啦。臨近聖誕又係電影上畫嘅旺季,剛好最近竟然同時間就有三部科幻一電影上映! 今個星期就同大家講下呢幾部科幻電影啦。

睇名似係科幻片、睇預告似災難片、真身係愛情片

近年科幻年愈拍愈多,不過大都是續作、重拍,甚至係翻拍,而且大都以軟科幻為主。比起「太空歌劇」(例如『星球大戰』同『星空奇遇記』系列)及「英雄類」,與其話『太空潛航者』睇起嚟更似『火星任務』之類,不如話佢係『劫後如生』嘅太空版+愛情片會比較貼切。

故事(唔劇透嘅講法)講述主角因一次意外而提早了90年從長途飛行休眠中甦醒過來,由於到達目的地仲要90年,雖然佢不缺生活所需,但由於冇辦法再休眠所以只能一個人生活到死為止,佢由於抵受唔到寂寞,最後將休眠中嘅女主角弄醒……

由於以愛情為主線嘅太空科幻同質嘅作品較少,感覺還新鮮的。如果係比較喜歡睇愛情片嘅朋友應該會幾滿足。而喜歡官能刺激嘅朋友,應該都會被片中嘅災難部分所吸引。不過如果係偏向硬科幻,或者係對劇情、設定有相當堅持嘅朋友,就可能會因為劇情結構單調薄弱,以及設定犯駁矛盾較多,而影響到對電影嘅印象。

精彩緊張有餘嘅太空歌劇,不稱職嘅外傳?

作為『星球大戰』嘅外傳作品,自然係「全世界都睇住」嘅注目話題作,有『星球大戰』嘅加乘票房亦順利成章得到好好嘅成績。故事大約係補完第三、四集之間嘅故事(即係黑帝君臨同新的希望中間嘅故事)。包括帝國開始製造同測試大殺傷武器「死星」,同敘述反抗軍係點偷到帝國的「死星」藍設計圖。

故事拍得都幾刺激緊湊,冇咗Jedi武士,戰鬥回歸恆常嘅常規戰法。打法唔再係原力互毆和「格劍」,所以艦隊戰、地面戰無輪規模、精彩度同寫實程度反而隨時好過晒其他星戰作品,對於喜愛戰爭片、甚至係『戰地風雲』、『COD』類型遊戲嘅朋友應該會非常滿足。

由於係外傳關係,加上故事早段比有啲「碎碎哋」,對於冇接觸過星戰嘅朋友應該會有資訊處理上嘅困難吧,加上由於前後嘅世界軸都已經「FIX死咗」,所以外傳一般重點都係落在角色身上,而偏偏角色描寫係套戲最弱嘅一環。加上新角色數量相當多,變成角色嘅心境/信念嘅變化,甚至係飛行員如何變節(劇透反白)等等都冇咩著墨,變相角色都有不同程度「紙牌化」,甚至一眾反抗軍為何最終選擇參與「俠盜一號」行動都係流於「作者說了算」,都算係一個小敗筆。

刺客教條,不負育碧「伏王」之名作品

以往一向被稱為『刺客信條』,不過因為近年官名莫名奇妙改咗做『刺客教條』,又莫名奇妙搞到『刺客信條』變咗「匪語」。不過呢啲都唔重要,因為「不求甚解」是華人特權嘛,同「魔戒抄天堂」係一樣嘅。

回到電影,改編自育碧蒙特利爾著名同名遊戲,圍繞兩個敵對古老秘密組織刺客兄弟會同聖殿騎士團嘅鬥爭終於搬上瑩幕,大概都一圓紛絲多年嘅心願吧。

電影可謂完美貫徹育碧一向嘅形象「雷聲大,雨點少」! 其實喺一部分粉絲當中,育碧係出咗名嘅「PV詐騙」,宣傅同本體永遠都係相差甚遠,遠嘅唔講,就講最近嘅『全境封鎖』,已經係一個極佳樣板。

今次電影都一樣。不錯,今次電影將遊戲中嘅飛躍道同信仰跳躍等都加進去,揉合現代科幻與古代神秘元素重現遊戲系列的各種著名畫面確實令人興奮,不過刻意風格化、神秘化嘅結果就係畫面黑黑沉沉,好多時連角色做緊咩都唔係好清楚,而故事一本之餘更加係支離破碎,明明係入戲院睇都好似睇緊槍版咁,實在令人佩服要如何才能拍成咁樣,能夠將原作曲折離奇嘅故事拍到咁簡單笨拙,真係已經係一種才能。