老娘的餐桌—— 貴

老娘一向係牛痴，曾幾何時，決心追尋最佳牛味，價錢平貴一律照殺。曾幾何時，香港洲際酒店嘅THE STEAK HOUSE winebar + grill 喺老娘的心中最愛 (不過呢期好窮，冇得去喇...)。

THE STEAK HOUSE winebar + grill嘅牛標榜用炭火燒烤，供應來自世界各地嘅靚扒。記得第一次去，雖然預咗貴，但睇到Menu後仍然打咗個突。不過既然嚟到，都叫咗份七百幾蚊嘅Rib Eye，雖然唔係頂級，但濃郁嘅牛肉味同嫩滑嘅肉質已經深深震撼味蕾，有種《食神》入面家燕姐對黯然銷魂飯嘅讚嘆，當時覺得以後都唔會去第二度食牛扒。(不過老娘唔係富豪，當然唔可能。) 另外，最深刻嘅仲有個排場，「八鹽十刃十幾芥辣」，每樣任你揀，食扒食得咁豪華，都幾滿足到虛榮感，成個人都好似高貴咗。

佢哋另一樣名物，就係Chocolate Fondant，即係朱古力暖心蛋糕，開頭以為同出面一樣，細細個，點知嚟到成塊面咁大，入面啲朱古力漿超級香濃，一切開即洶湧而出，即使我同朋友已經飽到上心口，都全力清埋佢。記得有一次，老娘Order份扒要Medium rare，唔知係我英文講得唔好定係廚師心情唔好，嚟到切開見到竟然係Medium well-done，Captain循例走埋嚟問我食物如何時，我話塊扒熟咗啲囉，佢本來想幫我換，但無謂浪費，熟啲都冇所謂，照食可也，最後Chocolate Fondant做甜品。到埋單Check單時發現冇計甜品錢，我哋就話俾Captain聽計漏咗，Captain話份扒令你唔滿意，請你食甜品補數，呢個Chocolate Fondant即刻變咗朱古力窩心蛋糕。

雖然老娘已經有一段日子冇去，睇網上食評似乎有跌Watt嘅情況，不過當時嘅味道同感覺仍然留喺老娘心中。咁啱渣打信用卡做緊洲際酒店餐飲優惠，包括埋扒房，晚市有85折，折扣雖然唔算多，但平少少都好啦。另外米芝蓮星級推介SPOON by Alain Ducasse更有75折，不過呢個優惠唔包Lobby Lounge，真係有啲可惜，因為老娘好鍾意聽住Jazz歎住香檳睇維港夜景。