美荷樓勁好HEA Cafe

 

今次帶大家去石硤尾嘅美荷樓，唔係帶大家去住佢嘅青年旅舍，而係去試下入面一間cafe，以前係叫呼吸冰室但已經轉咗四一冰室啦！裝修主打老香港元素，帶大家回憶一下舊香港！其實美荷樓係香港最早期嘅「H」形6層徙置大廈，被獲評為一級歷史建築㗎！因為石硤尾邨舊型大廈重建關係，第41座嘅美荷樓則獲得保留，用咗2億2千萬港元改建為美荷樓青年旅舍同旗下之美荷樓生活館，所以係年青人、文青嘅一個蒲點！

 

呢個就係歷史留落黎嘅第41座美荷樓啦，唔單止外表新淨，除咗係生活館之外仲有一個青年旅舍黎架！

 

行到入少少就會見到四一冰室，冰室除咗有室內仲有環境好優美嘅露天茶座比大家坐架！

 

四一冰室

特色雙層芝士豆腐漢堡 $68
個人評分 :  ★★★☆☆   (5星滿分)

如果大家係食齋嘅朋友，呢個漢堡真係好適合，因為佢中間係用炸豆腐黎整成嘅，而炸豆腐口感唔會好易散，再加上芝士同其他配菜，食落口感覺非常中西合璧！味道比起其他肉類漢堡包唔輸蝕架！而呢一個餐最正嘅我個人認為就係個薯條，薯條炸啱啱好，食落口一啖啖的creamy薯仔，薯條我比一百分！好好食！

 

泡沫玫瑰花茶 $32
個人評分 :  ★★★☆☆   (5星滿分)

泡沫咖啡就飲得多啦，用泡沫整嘅花茶真係第一次試，聞落去有香濃嘅奶味，但飲落去係好清香嘅玫瑰花茶，味道唔會好甜！

 

懷舊花生醬夾餅配焦糖香蕉 $48
個人評分 :  ★★★★☆   (5星滿分)

花生醬再配搭窩夫感覺非常邪惡，但食落去味道非常之夾！如果你覺得好甜，就要加上香蕉配搭窩夫一齊食，食落去感覺非常清新，而且香蕉加上焦糖嘅味道非常香口，如果鍾意食窩夫嘅朋友相信呢個甜品最適合你們啦！

 

另外餐廳入邊充滿懷舊裝飾，鍾意影相嘅你們！一定唔會錯過呢啲機會！加上cafe非常之休閒 ，好適合慢慢享受美好嘅下午，好多朋友都專程來食完野坐低同朋友吹下水hea下，真係幾舒服架！

 

除咗懷舊擺設之外，冰室入邊仲有好多唔同新晉設計師畫嘅畫，有一點懷舊之餘絕對唔會少左新潮嘅味道

 

 

如果大家年紀輕輕未睇過懷舊嘅香港，係呢間冰室會完全感受到懷舊嘅氣味，如果你係屬於嗰個年代，你亦會見到嗰個年代嘅代表物，完全係重拾舊時！正！

 

美荷樓 Cafe 41
地址：石硤尾巴域街70號石硤尾邨41座美荷樓地下
電話：3728 3454