紅豆綠茶厚多士？韓國人氣Tom N Toms Coffee觀塘新店試食
更新日期: 2016 年 10 月 13 日
最近觀塘apm就開咗一間韓國Coffee Shop－－Tom N Toms Coffee，呢間Cafe除咗飲Coffe之外，仲可以食吐司，更係香港人最鍾意嘅「厚多士」！其實，本來我係比佢嘅「Nutella棉花糖吐司」吸引，所以先想試下呢間Cafe㗎，但發現原來佢哋會不停推出唔同嘅期間限定，保持住新鮮感！
Nutella棉花糖吐司就無喇，但最新期間限定就有「綠茶紅豆吐司」。吐司之外，佢哋仲會有Pizza?，今期嘅Pizza期間限定就有「泡菜雞肉薄餅」，今次我抵諗啲做肥妹，為大家試下好唔好味啦！哈哈！
▲觀塘apm嘅Tom N Toms Coffee雖然地方唔大，但成個裝修真係好有韓國Cafe嘅感覺，令我即刻諗起我之前嘅韓國之旅！
▲今次我嘅目標就係呢兩個嘅期間限定啦！「泡菜雞肉薄餅」同「綠茶紅豆吐司」！
「綠茶紅豆吐司」
價錢 HKD$60
個人評分 ★★★★★ (5星滿分)
▲我個人唔太鍾意紅豆食完有種沙沙嘅感覺，但佢哋嘅紅豆唔會太甜，口感似紅豆蓉，所以容易入口。而綠茶醬好清新，唔會太濃而搶走其它味道，吐司外脆內軟。非常值得一試㗎！
「泡菜雞肉薄餅」
價錢 HKD$55 (中)
個人評分 ★★★☆☆ (5星滿分)
▲薄餅皮都幾脆口，薄薄地唔會太膩。泡菜份菜份量幾多，而且都幾辣下㗎，如果唔太食得辣嘅朋友就食完飲多杯嘢飲啦！但佢嘅雞肉就份量太少，如果雞肉多返啲整件事就完美啦！
「薄荷朱古力」
價錢 HKD$33 (中) / HKD$36 (大) / HKD$39 (特大)
個人評分 ★★★★☆ (5星滿分)
▲朱古力唔算太甜，而上面啲Cream滑而不膩，朱古力同Cream撈埋之後令到杯飲品再香滑啲！ 而佢嘅薄荷味有啲似細細個食個隻「薄荷朱古力豆」嘅味道，如果大家鍾意食薄荷朱古力豆一定會好鍾意依杯薄荷朱古力啦！
今次分享就到呢到啦，下星期再帶大家搵好嘢食啦，下次見！
－－－－－－－－－－－－－－－－－－－－
Tom N Toms Coffee
地址：觀塘觀塘道418號創紀之城五期(APM)4樓L4-26號舖
平均消費：HK$50以下
付款方式：現金
－－－－－－－－－－－－－－－－－－－－
【外賣或出街食都可勁賺里數】
https://www.hongkongcard.com/s/kwb0g
【伸手區- 信用卡/里數新手‧你問我答】