精明度「稅」月 稅務貸款基本解構

精明度「稅」月 稅務貸款基本解構

相關信用卡:

精明度「稅」月 稅務貸款基本解構

發表日期: 2016 年 10 月 13 日 更新日期: 2016 年 10 月 13 日 生活貸款稅貸

作者:積克

10月又係交稅季節,各大銀行都陸續推出有唔同優惠嘅稅務貸款計劃,出招搶客。如果有需要借錢交稅,首先要了解稅貸基本概念,再揀啱適合自己嘅稅貸計劃,咁就可以借得精明,輕鬆交稅。

以實際年利率為指標
月平息係代表未計其他收費,例如手續費同其他費用嘅每月還款利息,而實際年利率就係計晒利息、手續費、回贈優惠、豁免供款額之後,得出嚟嘅實際借貸成本利率。所以比較稅貸利息邊個低啲,一般都會以實際年利率作為指標,實際年利率較低,自然代表比較抵借。

最優惠利率因人而異
銀行標榜嘅「實際年利率 / 月平息低至 X.XX%」最優惠利率,都要喺特定情況下,例如借到某個金額,揀某個還款期,同埋要係特選客戶,同埋睇返申請人嘅職業、收入、個人信貸評級等等。

一般嚟講,最優惠利率都係以較高貸款額同較短還款期計出嚟,例如借100萬,還款期12個月。如果從事醫生、會計師、律師等專業,收入穩定,又或者喺銀行有理財戶口,有一定資產,利率都會靚啲。

不應借到盡
雖然有啲稅貸可以借到月薪10倍或百幾二百萬,超過晒一般打工仔交稅金額,不過最好借返交稅嘅金額就夠,免得借太多要白畀利息。如果有其他現金需要,可以借多少少,同樣以實際需要為準。

申請快至即時批核
由交齊身份證、住址證明、入息證明等資料起計,五個工作天內通常就有回覆。有啲稅貸標榜特快批核、即時批核,最快可以喺交齊文件同一日內覆返批核結果。

留意迎新禮品及回贈要求
稅貸有唔同種類嘅優惠,例如利息回贈、現金回贈、現金禮券、豁免部分期數利息或還款等。

不過唔好見到有優惠就申請,要睇返賺到優惠嘅要求,條件可以係借到指定金額、同時開立銀行戶口、信用卡等。另外,有啲優惠只限網上申請。

詳細參閱合約條款
除咗最基本嘅借貸額、利率、還款期,申請時要睇清楚合約入面有冇其他手續費、提早清還手續費費等嘅隱藏條款,有疑問最近要問清楚銀行。

稅貸不只交稅
雖然稅貸表明係用為交稅而設,其實好多銀行都冇規定客戶點樣運用稅貸,用嚟還卡數(同結餘轉戶咁用)、創業、結婚擺酒都冇問題。如果有其他財務需要,借稅貸都係一個辦法。

其他債務影響稅貸額
稅貸其實都係私人貸款嘅一種,如果本身已經有其他私人貸款、信用卡卡數,就會影響銀行批出稅貸嘅貸款額同利率。

好喇,講到呢度相信大家對稅貸都有基本認識,希望幫到大家,輕鬆度過「稅」月啦!