粉飾櫥窗效應

年尾很多散戶已收爐，不過只要有交易日，基金一樣要工作，形成很多「年尾追數」、「粉飾櫥窗」等基金操作手法的傳言，甚至形成「乾升乾跌」或最後一分鐘抽高質低的市況，矇查查入市隨時夾死。
 

要追，年尾流流升都無咁多人接貨，不過所謂「粉飾櫥窗」就的確是常用手法。股神巴菲特都不是隻隻中，何況基金操盤手中輸巴菲特九條街的大有人在，一般基金大市升時佢賺，大市跌時佢蝕，不「粉飾櫥窗」如何吸引新客仔？

粉飾櫥窗(Window Dressing)主要在年結或半年結前進行，即是六月和十二月，一般有兩方面演繹：一，換馬執靚基金投資組合；二，做靚條數。

基金一年有買有賣，無可能成個倉全年唔變，要砌個吸引的投資組合，就會沽出炒味濃的中細價股，換入有業績(起碼ROE靚仔少少)有派息的藍籌、其他指數成分股或者強勢股。

前文說過散戶收爐，市況好難熱炒，不過少咗散戶搶貨，方便「有心人」用細額成交推高股價，無錯的確無人接貨，但係賬面賺多咗，會計寫報告可以好睇少少。

補充少少，「乾升」或「乾跌」現象是指升市或跌市中，當天成交額相當細。形成「乾升」或「乾跌」除了基金出手，亦有炒指數和其他衍生大戶的影響，年尾平倉時候相當容易出現尾市異動。

本文不構成任何投資建議。