節日在家開中餐

做冬好像還是中菜比較合適，節日要在家做一頓像樣的中菜招呼朋友，也可以很輕鬆的。大有大做小有小做，唯一的原則是貴價的就最好不要在家弄，除非你有功夫用六隻雞十斤豬骨去做上湯餵鮑魚，又有一個用了十年八載的沙煲，否則再花心機也不能比酒家做得好。貴價料難辦，但家裡做的家常菜，又比酒家好得多。

今次不妨為大家介紹幾個方便的中菜。家常老火湯，用料新鮮煲得夠火候，天寒地凍飲多多都不夠。果皮蓮藕綠豆煲豬展，果皮浸水軟身後要刮去白色衣，綠豆釀入蓮藕小孔用牙籤封口，豬展出水。水滾後落齊料大火滾半小時，然後轉細火煲三小時。

薑汁臘味炒芥蘭冬天很合時，臘味切斜片，芥蘭枝葉分開切細段，磨薑只要薑汁，爆香臘味落菜，調味然後加薑汁，最後贊少少花彫，又香又暖胃。再來一個懶人菜，醉雞中翼。煲一煲滾水，加油、鹽、糖、桂皮、八角，滾到出味之後放雞翼，水一滾即熄火，由得雞翼自己浸熟，約需半小時，過程完全不需理它。取出雞翼用浸雞水兌花彫及糟露去浸雞翼，簡單又可以在日間預先做好。

如果家中有焗爐，可以做一個混合菜，山葵牛柳。日間將原條牛柳用平低鑊略煎至表面轉色，然後灑上適量糖、鹽、豉油備用。到晚上，將牛柳切片，用清水加糖將山葵醬開稀，塗上牛柳片，放入焗爐180度焗八分鐘。

完成三菜一湯，如果人多的話可以再做一兩個菜。可以早一天用滾水烚熟原條豬腩肉，然後用鹽塗勻整條腩肉，放涼後入雪櫃可存一星期。要用時，將腩肉切薄片用油煎至金黃，加幾粒蒜頭略爆，然後可以加西芹或甜豆炒，調味即成快靚正。

最後可以做一個三色蒸水蛋，皮蛋咸蛋切碎，一份雞蛋兩份水，蒸起後加熟油甜豉油，簡單又好送飯。

祝各位冬至團團圓圓。