租客無入息證明點算好？

今日喺網上論壇，睇到有個貼問人租唔租樓俾「地盤佬」好，因為好多工友出糧出現金票，無收入證明，怕係租霸唔交租。
買物業放租係投資，投資想確保回報相當合理，一陣真係遇著租霸唔單止收唔到租，上土地審裁處又要搞三幾個月，仲隨時俾佢破壞埋間屋嘅基本設施。但係掉轉睇，好多無收入證明嘅人例如：地盤工友、小巴司機或清潔工友等其實俾無良外判商迫做自僱人士，人哋都唔想。

其實除咗一般收入證明(過數紀錄、糧單和稅單)外，仲有幾個方法可以確保租客有能力應付租金支出：

租金一筆清
簡單方便快捷，要租客一次過付清租約期內租金(唔好以為人哋俾唔起，好多地盤工友收入係中產水平)。

銀行存款平均數
業主可要求租客提供三數個月的銀行戶口結餘，肯定他的資產值(同時防止租戶借錢扮有錢)。

現金票紀錄
有網友就建議戶口持有人可以向銀行拎提取現金票的紀錄，證明有持續收入，業主可以請租客先準備紀錄。
不過各位業主要記住，要求資料不是老奉，根據《個人資料(私隱)條例》：「個人的姓名、電話號碼、地址、身份證號碼、相片、病歷和受僱紀錄等都是條例保護的個人資料。」，你有權要求，租客亦有權唔俾。再者，上述方法只是降低風險，不能完全解決問題，有錢有收入唔代表無問題，例如上年嵐山開售時，有傳媒報道經紀教客人開空殼公司出糧俾自己「自製收入」，如果租霸用到呢啲手法，你都吹佢唔脹。如果唔想咁煩，又唔介意俾少少錢，可以搵租務管理公司，有專業人士幫你解決。另外可以收三個月按金，萬一撞正租霸都無咁傷。

P.S. 其實仲有一種人士無收入證明，就係新來港人士，當中唔少係零收入(可能手頭有少少錢)，租唔租俾呢類人士真係睇你有無熱心幫人，佢哋想搵政府幫手都要先有個住址證明，無人無物真係幾慘。