【祖琪帶你食好西 之 太子爆醬蟹黃飯】

【祖琪帶你食好西 之 太子爆醬蟹黃飯】

相關信用卡:

【祖琪帶你食好西 之 太子爆醬蟹黃飯】

發表日期: 2016 年 03 月 15 日 更新日期: 2016 年 03 月 15 日 飲食

作者:WING KI


我哋8點左右去到,一到個門口,已經見到有條隊排緊,睇嚟好多人都想搶頭啖飯喎。 我地等呀等,等咗一個鐘多啲,終於等到啦,好肚餓呀!
我地叫咗燒茄子,秘汁燒鰻魚,芝士燒生蠔,即日鮮秘燒鮑魚,西京安格斯一口牛,燒三文魚腩,芝士串同埋最最最重要嘅蟹黃飯。甜品方面,我地叫咗南瓜雪糕同香桃雪芭,呢兩款都係廚師哥哥大大力推介㗎。野飲就叫咗支烏龍茶同一罐可樂。
唔講咁多,大家Click入嚟都係想睇下啲食物好唔好食㗎啫。
好!事不宜遲!

祖琪食評時間:


招牌蟹黃飯
金黃色嘅蟹膏,配埋粒粒分明嘅白飯,真係見到都流曬口水。食落口,嘩!冇誇張,真係粒粒都有蟹黃味!份量亦都好夠,兩個人share都無問題。而且蟹黃上面仲放咗條蟹腳,真係食得「原汁原味」。咁足料嘅蟹黃飯真係唔係度度有,大家一定一定要試下。
好食指數:9/10


即日鮮秘燒鮑魚
呢個係店主推薦,每日限定嘅新鮮鮑魚,即場燒比你睇,賣相一流。啱啱燒好放上枱,熱辣辣咬落口,真係好鮮味,唔洗加特別嘅調味已經好好食,口感仲好爽口彈牙。每日限定,聽到係咪更加想食呢?
好食指數:8.5/10


秘汁燒鰻魚
燒鰻魚都係呢間鋪頭嘅主打之一,咪睇佢個樣好似一般平時食壽司嘅鰻魚,佢落嘅秘製醬汁絕對係重點,濃郁嘅燒汁加上厚肥嘅鰻魚,入口即融。絕對係呢度嘅必食之選。
好食指數:9/10


芝士燒生蠔
呢間鋪叫得做「魂燒」,就梗係有好多「燒」嘅嘢食。阿祖佢就最鐘意食芝士,有芝士佢就啱㗎啦,佢一見到就話要食。個芝士味幾濃,件蠔都幾鮮味,不過如果大隻啲會更開心。
好食指數:7.5/10


秘汁燒茄子
又係燒嘅,不過呢個係燒茄子。條茄子大到可以一人一半分嚟食,適合同朋友開心share。咁大條茄子,要燒得好食入味真係唔簡單,但呢個茄子配上燒汁,真係好入味,咬落口仲有好多汁流出泥。
好食指數:8/10


西京安格斯一口牛串/芝士串
見到個名「西京」好似幾得意,就叫咗嚟食。其實都食唔出佢個味道有咩特別,但個一口牛嘅質都幾軟,唔痴牙。芝士串都好香芝士味,當做小食都唔錯。
好食指數:7/10


燒三文魚腩
呢個三文魚算係咁多款入面我最唔推介,我都係鐘意食三文魚腩,但呢款實在太肥啦。咬落口好多油,多到有啲膩。
好食指數:5.5/10


南瓜雪糕/香桃雪芭
作為吃貨嘅我哋,到最後點可以唔叫返個甜品作為美滿嘅ending。呢兩個甜品係師傅們大力推薦,皆因佢夠「特別」。呢個南瓜雪糕係用原隻南瓜裝住,個雪糕除咗有超濃南瓜味,口感亦都滑到一個點,諗番都想食多個。絕。對。必。食。而香桃雪芭就令我覺得似細個食嘅冰菠蘿,好甜好品啱女仔食。
好食指數:9/10

想知有咩好嘢食,記得留意下次祖琪嘅推介啦,鐘意就比個like同share出去啦。

招牌蟹黃飯 $128
秘汁燒鰻魚(半) 約$57
即日鮮秘燒鮑魚 約$42
芝士燒生蠔 $28
秘汁燒茄子 $18
西京安格斯一口牛 $28
芝士串  $19
燒三文魚腩 $25
南瓜雪糕 $38
香桃雪芭 $38
可樂加烏龍茶 $18
是次消費:$439
只收現金

地址:太子道西 106D 地下 ( 太子站 C2 出口斜對面 )