真・試食小報告：紫薯芝士雞煲 伏唔伏？

真・試食小報告：紫薯芝士雞煲 伏唔伏？

話說今年只要你一行出街，周街都係紫薯乜乜，芝士乜乜。
香港人究竟有幾鍾意紫薯同芝士，有幾多創意同大膽先做得出紫薯芝士雞煲呢？
網上有人推介過，但係又無講好唔好食喎，咁雅軒決定自己去挑戰一下這個聽完個名都唔知係咩味嘅新菜式。

環境

其實係小店一間，所以一定會坐逼少少，單人好似我咁就坐單面長枱自閉座，其他位就都OKAY！而且通風幾好，食完唔會有成身火鍋味。仲有！店入面個男侍應好可愛好幫得手，我問佢好多問題都笑笑口，仲會教你點食。

重點來了：「紫薯風暴」
「紫薯風暴」－紫薯芝士雞煲用咗Mozzarella同車打芝士、三黃雞同本地紫薯做嘅。
一來到，個顏色真心靚，係麥當勞的紫薯雪糕色，但係就聞唔到任何味，就好似吉野家嘅打邊爐味。
食落去味道是有少少奇怪的，有淡淡嘅蕃薯芝士味，不過是咸的！但係芝士就真係好加分。
碟炸雞就好正常，唔放入去個湯到仲好食。
後期越煲越「杰」，再加埋烏冬食，就真係好奇怪，有少少唔知食緊咩嘅感覺。

配料

唔夠食仲有得追加配料，同樣地食物名都係怪怪地。
「薑汁皮蛋貢丸」－貢丸再加紫薯，真係好似食緊咸湯丸。
「流心金瓜炸旦」－點埋蕃薯醬，澱粉質加芝士加澱粉質加炸，嘩，聽到飽飽啦。

加湯

當食到一半要加湯, 整個湯沖到色都變埋...紫沖開了便淡...嗚嗚嗚...連少少紫薯味都無埋，變咗豬骨味。

龍蝦芝士海鮮鍋

我決定叫多一個食，好掙扎咁揀咗龍蝦芝士，本身男侍應話蕃茄都好好食的。
一黎到，真係好多芝士同埋好香，我有返打邊爐嘅感覺。

當芝士滾起咗，堆芝士好像腦漿咁....不過好好食！
龍蝦芝士個湯底有少少似吉野家味，但又比吉野家濃，真係龍蝦有龍蝦味，芝士有芝士味，海鮮有海鮮味！加烏冬煮係好食過自家烏冬的！強烈推薦！

雅軒小評分：
味道：7（是俾龍蝦的，紫薯2分)
環境：4 （逼逼的）
服務：8  （禮貌是很重要的！）
價錢：6  （芝士值回票價）
個人：7（雅軒好麻煩，但係服務好好，其他野都好食的)

$89紫薯芝士雞煲
(包白飯、出前一丁、鳥冬、拉麵、米線五揀一)
＄92龍蝦芝士海鮮鍋
(包白飯、出前一丁、鳥冬、拉麵、米線五揀一)
限時90分鐘
=========================
拼食三郎

地址：九龍新蒲崗崇齡街33號新蒲崗廣場1樓B07號舖
營業時間：
星期一至六 1100-2200；
星期日、公眾假期 1730-2200
電話：21046678
只收現金