【真·厚切】祖琪帶你食好西 之 荃灣巨型壽司

 

做得食肆，除咗食物要真材實料，話題性都好重要。呢間真味日本料理喺荃灣可謂出晒名，一直有唔少捧場客。呢度嘅壽司出名好大件，壽司上面嘅刺身全部都係「厚切」，真係啖啖肉。最重要嘅係價錢中等，想食壽司又唔想次次食放題咁悶，可以考慮吓嚟呢度食。

 

 

 

我哋係平日嘅九點左右入去，等左大約15分鐘左右就有位。鋪頭入面四面牆都貼滿餐牌，全部寫晒食物名同價錢，仲有好多相睇添， 大家係叫嘢食之前都可以用來做參考。

事不宜遲，祖琪廚房，食左先講。

祖琪食評時間

三文魚壽司

 

 

 

 

第一次食咁大件嘅壽司，真係連筷子都夾唔起。冇諗過三文魚壽司都會有驚喜，咬落口肉質嫩滑，雖然唔算好肥美。但大大啖咬落去真係好過癮。
好食指數：8.5/10

帆立貝壽司

 

 

 

 

呢度就連帆立貝都係大大嚿，不過就冇三文魚咁有鮮味，以呢個價錢來講已經可以接受。
好食指數：8/10

明太子沙律壽司

 

 

 

 

呢款壽司可以話呢度嘅特色之選。好似骰仔咁大粒嘅明太子遍佈成件壽司，咬真係卜卜聲好得意， 加埋沙律醬真係好好食，食完會想再食多件。
好食指數：8.5/10

蟹籽沙律壽司

 

 

 

 

同樣係以量取勝，不過就冇咩特別，唔算特別有鮮味。
好食指數：7/10

火炙三文魚腩壽司

 

 

 

 

真係好好味， 介乎熟都唔熟之間嘅三文魚，有一種入口即溶嘅口感，有油脂但唔油膩。
好食指數：8.5/10

大蝦海膽炒飯

 

 

 

 

最近咁興食海膽，我哋兩個又點可以錯過呢個大蝦海膽炒飯呢？呢個飯值得一讚嘅係飯粒炒得夠乾身夠香，而且海膽同蝦嘅份量都好足料。但係我哋覺得如果個飯嘅味道濃少少會更加好味， 依家對於我地嚟講有啲清淡。
好食指數：8/10

是次消費：
三文魚壽司（2件） $32
帆立貝壽司（2件）＄50
明太子沙律壽司（4件）$56
蟹籽沙律壽司（2件）$28
火炙三文魚腩壽司（2件）＄48
大蝦海膽炒飯 ＄98
總數＄312

付款方式：
現金
真味日本料理
地址： 荃灣兆和街23號海晴軒地下11號舖