盆滿缽滿迎新年

唔好意思，我又遲交稿，編輯係咁send「罪與佛」嚟威脅我>_<！！篇盆菜終於出爐了，希望各位笑納！提提大家，因為盆菜好難計重量，可能係個盆重咗而唔係啲料多咗，所以今次係以人頭計平均數，如有計錯數或有漏網，希望大家多多指教！照慣例，先去表！

除開人頭兼不問材料，抵食嘅係 渣打 x 美心MX「福聚滿盆盆菜」(10人用)。每人$48.8有瑤柱碎、蠔豉、豉油皇蝦、南乳豬手同盬香雞，鮑魚免問。如果覺得唔夠食，其實仲可以用低於半價加配百花釀蟹鉗($108/6隻)、瑤柱蝦仁炒飯($98/2磅)等美食。Lady C.我覺得如果同親人食當然冇問題，如果係打算拎嚟款客可能真係要考慮吓其他選擇。


講到要堅持食鮑魚先覺得夠氣派，因為唔知每個盤菜隻鮑魚有幾大，單以價錢講就係 星展 x 大家樂「鮑魚瑤柱福袋盆菜」(10-12人用)較抵，平均$52.3一位，包埋有日本宗谷瑤柱、茄汁中蝦同黃金福袋。真心，想知福袋係咪似吉野家打邊爐果啲，Lady C.我個人幾啱食！

如果真係驚將貨就價，想買返酒家貨，可以選擇 中銀 x 美心中菜食府「好市大利鮑魚盆菜」(6/12人用)，選12人抵食過6人，12人用嚟講平均每人$105.3，有原隻鮮鮑魚、特級蠔豉、瑤柱脯同髮菜球，睇落係穩陣款。


講開又講，中銀 x 得龍大飯店個盆菜優惠除開每人嚟講係貴，但訂就送個價值$400嘅多功能陶瓷鍋同免費送貨，以「一品鮑魚盆菜」(10-12人用)嚟計，即係每人$157.3，同幫襯 上商 x 名都酒樓、聘珍樓個珍饈滿盆盆菜(8人用)一樣價錢。咁當然啦，前題係真係要認同個鍋係值$400先係咁計數。

最後提提大家，其實星展 x 大家樂「風生水起笑哈哈」唔係盆菜嚟，係Lady C.我貪得意放埋落個表度。我朋友話一睇就知呢個係前菜set，包煙三文魚呢味嘢，都係肯定屋企老人家唔介意先好落單喇！