的士加價 益晒Uber

行會日前批准的士加價方案，4月紅綠藍的士車費齊齊加，因為涉及修例，有待立法會通過。我哋發現，依家搭Uber其實已經可能平過搭的士，的士加價後，Uber嘅優勢變得明顯，出租車巿場或會出現重大改變。

 

按行會批准嘅方案，紅綠藍的士落旗頭2公里未跳錶前嘅車費一齊加$2，分別加到$24、$20.5及$$19。新收費下，所有的士每行200米跳錶都加咗價（如表1）。

 

▼表1︰新舊的士收費詳情

 

新Uber X平過的士

 

以前的士加價，的士大佬都會讚好，因為車費增加，佢哋收入會改善。不過自Uber加入出租車巿場後，的士大佬嗌晒救命，依家話加價，一嚟驚少咗人搭，二嚟驚車主有藉口加車租，得不償失。

一直以嚟，服務質素較好嘅Uber，無論長途定短途車，收費都比的士高，所以Uber至今未對的士生意做成好大影響。不過的士行同車主要求加價嘅時候，Uber其實喺上年推出「新Uber X」收費（表2），乘客喺九龍同新界上車，邊度落車都好，車費會大約比舊價平2成！

我哋跟據新Uber X收費計算，發現綠的車費仲有得鬥 ，但紅的嘅車費優勢已經消失；新的士車費若獲立法會通過，紅綠的士嘅車費將貴過新Uber X（表3）！

 

▼表2：九龍新界上車搭Uber，按新Uber X收費計算，計算方式是基本收費+每分鐘收費+每公里收費

 

▼表3：如果司機足夠，交通暢順的話，可見新Uber X車費，3公里後收費開始比的士平

 

 

九龍新界人搭Uber有着數

 

從表3可見，喺港島區乘搭Uber X，由於車費以舊Uber X收費計算，無論喺紅的新舊價格下，搭Uber點都貴過搭的士。不過九龍或新界上車，新Uber X基本車費只係$7，而且每公里只收$5，雖然車程每分鐘額外收$0.6，但路路暢通嘅話（表3假設每公里車程2分鐘），收費就平過晒紅綠兩的。

換句話講，九龍同新界人搭Uber X，只要交通暢順，司機又夠嘅話，係可以平過搭的士！另外，Uber不時同銀行合作提供優惠收費，呢樣嘢係現金交易嘅的士無法做到。今次的士行要求加車費，係咪搬石頭掟自己隻腳？立法會議員為咗的士大佬嘅生計，會否「高抬貴手」？