痛夠了嗎?止痛貼比拼及選擇貼士

痛夠了嗎?止痛貼比拼及選擇貼士

相關信用卡:

痛夠了嗎?止痛貼比拼及選擇貼士

發表日期: 2016 年 06 月 22 日 更新日期: 2016 年 06 月 22 日 生活

作者:Yvone 二方

打工仔返office,日坐夜坐又唔郁,好易令肌肉僵硬做成酸痛,又或者做運動做成肌肉酸痛,唔少人都會選擇貼肌肉止痛貼。行落街都有唔少肌肉止痛貼可以選擇,到底佢哋有咩分別呢?

先講講止痛貼入面常見有咩成份先,最常見嘅莫過於水楊酸、薄荷醇、樟腦同埋辣椒素。

水楊酸(Salicylate)係一種由植物提取出來嘅成份,佢嘅結構同阿士匹靈相似,喺好耐之前已經係用來止痛、退燒,仲有消炎嘅效果,今時今日水楊酸都會拎來紓緩肌肉痛。

薄荷醇(Menthol)有局部麻醉(local anaesthetic)同埋對抗刺激劑(counterirritant)嘅效果。所謂對抗刺激劑(counterirritant)即係指嗰種物質能夠喺某個部位做成刺激或輕微嘅發炎,目的係令本身酸痛或發炎嘅部位冇咁痛。咁即係咩?我用例子答你。當你牙痛嗰陣,隻腳唔小心踩到lego,呢個時候你淨係知道腳板底好痛,咁就暫時唔記得咗牙痛了。

樟腦(Camphor)就有輕微嘅局部麻醉(local anaesthetic)效果,不過如果大劑量嘅話,都會做成毒性,可能會做成噁心、嘔吐、暈眩以及抽搐等等。如果只係用肌肉貼呢啲產品,樟腦嘅含量唔高,只要跟足指示用,唔使擔心會做成毒性。

講起辣椒素(Capsaicin),好多人都會諗起減肥產品,其實佢都會用喺一啲外用嘅止痛產品上面。辣椒素透過作用於TRPV1受體,產生熱嘅感覺。TRPV1受體都可以受到熱力或者物理磨擦刺激產生作用,不過辣椒素就可以令受體產生作用而身體冇受到物理性嘅傷害。辣椒素同薄荷醇一樣,都係屬於對抗刺激劑(counterirritant)。

市面上你隨手買得到嘅肌肉止痛貼,主要成份多數都係以上講過嘅。我哋睇一睇常見嘅產品先。

撒隆巴斯(大片)

呢隻配方有加埋維他命E,有扮開靚嘅都知道維他命E對皮膚好。維他命E係一隻抗氧化劑,可以幫助肌膚預防老化。

虎標鎮痛藥布(冰感)

虎標鎮痛藥布(溫感)

留意溫感比冰感多了辣椒提取液。

必理痛滲透止痛貼

如果以上嘅止痛貼都止唔到你嘅痛,你可以考慮去藥房行一轉,問吓有冇含有非類固醇消炎止痛藥(non-steroidal antiinflammatory drugs/NSAIDs)成份嘅止痛貼。常見嘅成份有雙氯芬酸鈉(Diclofenac Sodium),相信佢係透過抑制環氧合酶(cyclooxygenase/COX)去抑制前列腺素(prostaglandin)嘅產生,從而達到消炎止痛嘅效果。Diclofenac嘅止痛貼只可以喺藥房有藥劑師當值嘅時間先買到,記得講清楚依家有冇食緊其他藥或健康食品,有冇高血壓、心血管等嘅狀況,或者任何藥物敏感,都可以幫到藥劑師判斷Diclofenac啱唔啱你用㗎。

必理痛特強滲透止痛貼

服他靈酸痛藥布

如果都仲係止唔到痛,其實仲有其他產品嘅,不過要醫生處方,自己胡亂使用係好危險㗎!所以唔好聽到人話好又自己走去唔知邊度買呀。如果真係痛到咁,去醫生度睇吓咩事啦!

肌肉止痛貼Q&A

1. 就咁貼塊止痛貼都唔夠勁嘅,等我食埋口服止痛藥先,得唔得?
藥唔可以隨便咁食啊!如果止痛貼入面嘅成份同口服止痛藥重複,可能會令你吸入過量嘅藥物。同樣道理,用咗止痛貼就唔好再用止痛膏喇,成份可能重疊㗎!

2. 有傷口嘅皮膚可唔可以貼止痛貼?
有傷口就唔好貼喇!止痛貼應該只用喺完整嘅皮膚上面。

3. 塊止痛貼唔啱size,等我剪剪佢先!
唔係隻隻止痛貼都剪得㗎!因為剪咗可能會影響佢嘅藥物釋放,可能會令釋放出來嘅藥物增多,影響健康。要睇清楚包裝盒上面有冇寫住可唔可以剪啊~

4. 貼完止痛貼,再搵熱水袋敷吓等佢舒服啲先。
唔好咁做啊,因為加熱個止痛貼都會改變止痛貼嘅藥物釋放,身體吸收多咗就唔好啦!

最後同大家做個比較:

 提提大家,記得要跟住包裝上嘅指示去使用產品,如果有敏感反應就應該停用喇。如果用咗一排情況都冇好轉,咁就要去睇醫生了。

如果習慣去連鎖個人護理用品店買個人護理用品,可以用以下信用卡:
用恒生enJoy卡,每月1號以及20號去萬寧消費都有95折。
由即日起至2016年6月30日,以DBS COMPASS VISA於指定類別簽賬(包括於屈臣氏、萬寧、759KAWAIILAND消費),可享5X COMPASS Dollar。