申請唔到仲好 美食車貴過開鋪

申請唔到仲好 美食車貴過開鋪

相關信用卡:

申請唔到仲好 美食車貴過開鋪

發表日期: 2017 年 02 月 13 日 更新日期: 2017 年 02 月 13 日 生活

作者:甦師父

特首參選人、前財爺曾俊華力推,為期2年嘅美食車先導計畫,今個月初開始咗喇。不過唔知係咪佢本人做開「中產」,未到參選都唔知民間疾苦,架架美食車賣嘅嘢食都貴到離晒地,好似6隻餃子要$40,一盒醉豬手要$50,漢堡包就要$68,做唔到巿民抵食夾大件嘅期望。所謂羊毛出自羊身上,賣得咁貴,可能同美食車營運成本太高有關。

美食車都要交租

首先,一架美食車,成本就已經大約$60萬,仲要畀食環署、運輸署同消防等部門檢驗同發出相關牌照,如食物製造廠牌照、流動食物處理車牌照等。有指設備完善嘅美食車成本可能過百萬!

第二,依家供美食車停泊做生意嘅地點只有8個,美食車申請人須向各場地管理者繳交電費、泊車費、清潔同管理費等「租金」,拉勻每個月$1.8萬,當中金紫荊廣場最貴,要$2.2萬,觀塘海濱最平,只需$9,200;唔似人哋美國咁好多地方都可以隨便泊低做生意,局限都幾大。

重點係,上述講嘅只係「最低租金」,如果營業額喺計算一個百分比後,高於固定租金金額,服務費就以呢個百分比計算,例如喺黃大仙廣場做生意,一個月營業額係$12萬,計算15個百分比後得出$1.8萬,咁租金就以價高為準,即係$1.8萬而非$1.7萬(請參考下圖),換句話講,賺得愈多,租金愈貴!由於美食車每2個星期轉場一次,場地每月實收租金均除2計算。

▼各場地租金收費不一,租金收費以計算後較高者為準

▼黃大仙廣場有美食車停泊,但唔少都係好奇睇吓就算,唔多人買嘢食

▼$114食呢幾樣嘢,大家覺得值唔值?

成本遠比小食店高

美食車先導計畫為期2年,每個月硬食$1.8萬租,1年就要近$22萬,2年就$44萬;唔計食材、人工、停車場泊位、美食車油錢、商業登記、申請相關牌照等開支,美食車加租金,呢盤生意嘅2年最低成本已經要$104萬!

開60至100呎大嘅小食店,連裝修同器具,行內人士預計開業成本約$40萬左右,比$60萬嘅美食車平20萬!所以開業成本上,搞美食車遠比小食店高,但無可否認,用$1.8萬租到旅遊景點泊位,呢樣嘢係開小食店無法做到。

賺錢能力成疑

講到銷售,大家都知香港人幾咁貪新鮮架啦,美食車一開幕時,人頭湧湧,但大部分受訪者都話價錢貴,食過就算,唔會返頭食,換句話講,美食車長遠嚟講好靠遊客生意。8個泊位,個個都係露天,一嚟怕打風落雨、冷熱天氣,二嚟冇座位提供畀食客,難保未來2年美食車能一直保持受歡迎。加上平日人流沒保證,預計大部分收入都來自假日,這盤生意未必如想像中好做。

搞美食車成本高,食品質素要求亦高,賺唔賺到錢又成疑,搞唔成美食車嘅人士,其實唔使太灰,租個靚鋪,賣下價廉物美嘅街頭小食,或者會賺得更多呢!

一係等2年後先導計畫完成晒,政府檢討後會優化計畫,依家睇定啲,大家到時再申請搞美食車都唔遲吖。

▼地點日曬雨淋之餘,仲要冇枱櫈提供,企喺度食好唔方便