現金回贈主義者

近排越來越多網站有詳細教學，教你點樣用信用卡先可以兌換最多嘅里數。但要去旅行有時都唔一定要換里數先抵。簡單嚟講，如果有廉航飛嘅航點，用現金回贈買機票會抵過用里數換。

就好似飛台灣、東京、大阪、名古屋、新加坡、宿霧、首爾、釜山呢啲香港人熱門嘅旅遊地點，廉航張機票連埋稅先唔駛二千蚊。如果用分換可能淨係稅同燃油附加費已經要千五蚊。而家連飛長途少少嘅悉尼同珀斯有星航旗下嘅廉航Scoot，喺新加坡轉機連稅唔洗三千蚊（國泰飛澳洲淨係啲附加費都收$2,383），所以用里數換機票去廉航都飛嘅地方一啲都唔抵，反而賺現金回贈仲划算。當然啦，如果要飛長途啲，好似歐、美等地，冇廉航飛，就真係要儲里數先值得。

唔信嘅話計條數俾你睇，以飛日本東京或者大阪為例，HK Express 或香草航空（ANA 旗下新開廉航）連稅大把 $1,500 內嘅機票（$1,500 內仲要唔係 promo 價，如果做 promo 隨時可以再打個7折）。以 1% 現金回贈嚟講，$1,500 嘅機票即係要碌 $150,000。而用里數換飛東京嘅機票要 30,000 里，全城本地消費換里數最抵個張卡（渣打WordMiles AE卡碌 $5 有 1 里）都要碌 $150,000 兼要俾 $644 附加費，仲未計換里數需要嘅手續費同埋唔係到到都收 AE 卡。

今次同大家分享三張恆常現金回贈（即係冇限要特定消費商戶或種類）最高嘅信用卡，而一眾信用卡現金回贈嘅詳細比較表可以參考呢個post：

1. 渣打 WorldMiles AE 卡

聽到張卡個名你可能會冧係咪搞錯咗。冇搞錯！皆因呢張卡其實唔係直接俾里數你，而係俾360°積分你，每碌 $1 有 3 分，而每 15 分就 1 里所以即係每碌 $5 就有 1 里。但啲積分除咗可以換里數之外，仲可以用嚟當錢洗。方法好簡單：


以 285分兌換 $1 回贈嚟計，為番起有成1.05%回贈，以現金回贈嚟講，一啲都唔差。現金回贈會係你下期嘅卡數到自動減番。最好嘅地方係你有得揀，到最後如果都係想兌換里數一樣冇問題，靈活好多！但始終係 AE 卡，所以唔係間間商戶都收，而且冇八達通自動增值，連ATM提款功能都冇。

如果你仲未有渣打信用卡網上戶口，而家申請仲有$150送添！由而家至2014年12月31日，只須 (1) 登記及登入網上理財； (2) 登入Breeze流動理財及 (3) 於2015年3月31日前，在連續3個月內，至少每月1次在上網查詢賬戶餘額就得架啦！

想申請呢張卡嘅話,，而又冇渣打信用卡，可以食埋迎新優惠，碌$8,000有$800現金（計埋原本啲分再多$85)。

2. 渣打白金行政人員信用卡

呢張卡要用渣打出糧，同埋對比起上面張 AE 卡少 0.05% 回贈。不過，佢係 MasterCard 所以基本上收信用卡嘅地方都用得佢，所有簽帳（包括八達通自動增值、電話費自動轉賬）永久有 1% 現金回贈，而且海外簽帳有 2% 現金回贈。

另外，渣打信用卡每年都有幾個唔錯個現金回贈優惠，包括通常係暑假期間嘅海外及網上消費 3% 現金回贈同埋年尾嘅餐飲回贈（上年每個月餐飲消費達$3,000，連續兩個月就送$900；今年限制多咗，星期六有10% ，其他日子得2% - 但單一簽帳最多回贈$50；7 - 8月每個月最多回贈$300；9-12月每個月最多回贈$100），所以冇渣打信用卡嘅朋友可以考慮申請番張旁身。

3. 大新ONE+白金卡

同渣打白金行政人員信用卡一樣，有全天候1%現金回贈 （包括八達通自動增值、電話費自動轉賬），不設上限。但呢張卡海外簽帳得 1% 現金回贈，連埋1.95%外幣手續費，海外簽帳要蝕0.95%俾佢。迎新優惠為 5% 現金回贈，上限為HK$300。

下一次想去旅行嘅時候，不妨考慮下先攞現金回贈，再買機票，可能比換里數更加划算，又或者唔理三七二十一收AE卡嘅話先儲落渣打張 WorldMiles 卡，到要換嘅時候先冧要現金定里數！