玩盡日本環球影城 門票及快証全攻略

玩盡日本環球影城 門票及快証全攻略

相關信用卡:

玩盡日本環球影城 門票及快証全攻略

發表日期: 2016 年 08 月 05 日 更新日期: 2016 年 08 月 05 日 旅遊

作者:Stella Yeung

去大阪旅行好多人都會去日本嘅環球影城,上次就同大家分享完今個夏天嘅限定主題啦,但發現原來買門票或快証都一係門學問,所以今次就決定分享下買門票同快証嘅少少資訊同攻略!

門票基本介紹
日本環球影城門票,1日券成人就¥7,400,4-11歲兒童就¥4,980,另外仲有一啲特價門票,例如晏晝3點後入場嘅門票¥5,900(約8折)、生日優惠門票¥6,900(約93折扣) 買咗門票場內嘅所有遊戲都可以玩,不過期間限定就要另外買票啦,例如依家2016年夏日限定UNIVERSAL JUMP SUMMER嘅「死亡筆記真實逃脫遊戲」同「海賊王Premier Show」,2016年萬聖節期間限定嘅「トラウマ 2 ~最恐実験病棟~」等等 。

環球影城Express Pass 特快通行
雖然買咗門票已經可以玩到大部份嘅遊戲,不過通常都會超多人,例如「哈利波特禁忌之旅」、「飛天翼龍」、「蜘蛛俠驚魂歷險記 – 乘車遊」、「荷里活夢想乘駕」通常都要排起碼2個鐘以上先玩到。所以另外有Express Pass特快通行證可以買,當然快証都要排隊啦,但係排一條專比買快証者嘅隊伍,一般最少都慳返超碼3分2嘅時間就可以玩到㗎啦,當然快証價錢都唔平啦!

Express Pass特快通行類型
快証都有好多唔同嘅版本,例如固定遊戲設施嘅快証啦,限定遊戲嘅快証啦等等,快証嘅內容唔係固定不變,因為樂園定期會推出一啲期間限定嘅項目,所以快証嘅內容都會不停重新組合! 所以決定日子買快証之前可以去USJ官網睇快証內容啦!
快証每個遊戲項目只限使用一次,如果要玩多次,就要排返一般嘅隊啦。價格方面,不同版本嘅快証價錢都會唔同,而且唔同日子價錢都會唔同㗎。

先同大家睇下常見嘅Express Pass 4同 Express Pass 7嘅快証啦!

▲ 以上依個係Express Pass 4,姐係有指定4個 game可以體驗嘅快証!有2種比大家選擇,如果你地玩機動遊戲的話可以選擇左邊,如果唔玩刺激遊戲右邊就啱你啦!Express Pass 4 價錢係 ¥4,500 ~ (唔同日子價錢會唔同)


▲ 以上依個係Express Pass 7,即係有指定7個 game可以體驗嘅快証!有3個版本選擇,有「太空幻想 - 乘駕」、「飛天翼龍」、「荷里活夢想-乘駕-背摔」依3大主要遊戲選擇,如果你哋玩機動遊戲的話揀飛天翼龍最抵玩,因為佢同其餘2款比較佢係最多人排、最刺激、最新嘅遊戲!Express Pass 7 價錢係 ¥6,900 ~ (唔同日子價錢會唔同)



Express Pass 4 & 7 攻略
如果大家決定咗買快証,去嘅時候又無期間限定的話,到底應該買Express Pass 4 定Express Pass 7好呢 ?
買快証好睇你哋去嘅時候啦,如果你地係淡季(非假期日子)去又無撞到星期五六日的話,可以建議大家買Express Pass 7,因為樂園平日星期2-4會比較少人輪候都唔會咁耐,所以Express Pass 7 啱啱足夠大家係樂園影下相、食下嘢、玩遊戲,唔會太趕急輕鬆地享受。
但如果大家係假期去樂園超級多人的話,建議大家買Express Pass 4啦,先舉個小例子樂園超多人嘅時候一般遊戲輪候大約基本都要140分鐘以上(我見過有360分鐘㗎),用Express Pass入去會慳咗大約3分2嘅時間,姐係最少都要大約30分鐘啦!但大家山長水遠嚟到日本玩,一定會用時間行下食下嘢,所以計一計時間多人的話Express Pass 7絕對唔夠時間玩㗎!所以如果多人嘅時間大家千祈唔好覺得買Express Pass 7好似多啲嘢玩感覺上抵啲而買呀,係極有可能唔夠時間玩㗎 !!!!

比個真實例子大家參考啦!我6月中去過日本環球影城,而係買咗Express Pass 7嘅快証,當日係星期二又未到假期,樂園唔算好多人,我係大約中午12點入樂園嘅,見到一般輪候最多個個只係120分鐘(「哈利波特禁忌之旅」、「飛天翼龍」),而我用快証玩「哈利波特禁忌之旅」只需要等15分鐘右左,我喺樂園逗留由12點到7點,只係啱啱好玩晒Express Pass7啲Game,雖然我好晏先入場,但我輪候時間非常短!所以係淡季(非假期日子)去又無撞到星期五六日買Express Pass7 就最抵玩啦!

期間限定的快証
依家有2個有提供快証同另外付款遊戲嘅期間限定可以比大家買到,一個係2016年UNIVERSAL JUMP SUMMER 同 2016年萬聖節期間限定。


▲「UNIVERSAL JUMP SUMMER」期間限定 2016月7月1日- 9月4日
分別有「龍珠4D」、「死亡筆記真實逃脫遊戲」、「海賊王Premier Show」、小朋友嘅「妖怪手錶」


▲除咗「妖怪手錶」同「龍珠4D」唔需要額外付款之外,「死亡筆記真實逃脫遊戲」、「海賊王Premier Show」係要額外比錢預約買票嘅,所以如果想玩埋死亡筆記同海賊王Show的話就建議大家買¥8900夏季快証啦!因為香港係買唔到海賊王Show嘅門票㗎!!! 海賊王Show 表演時間約75分鐘,死亡筆記真實逃脫遊戲時間約90分鐘,所以依張快証係貴得有道理㗎!


▲2016年萬聖節期間限定「環球驚喜萬聖節」,限定日子2016年9月9日-11月6日
分別有10樣遊戲同園區演出,鬼屋分別有「崇Tatari 活公仔的詛咒 」、「Trauma 2 最恐怖實驗病棟」、「驅魔人 驅魔人之館 」、「猛鬼街 TheMaze 2 」、「娃鬼 Chucky 的恐怖工廠 3 」!除咗鬼屋之外樂園仲將「烈火雄心」設施改為「學校怪談之旅 被詛咒的遊樂設施 」再喺4D影院有同樣主題嘅4D電影,再將「未來戰士 2:3-D 」改為「貞子 ~被詛咒的遊樂設施 」!超多嘢玩!*「Trauma 2 最恐怖實驗病棟」係要特別再買門票。

▲萬聖節快証有分遊樂設施呈現同鬼屋快証推出,如果想玩晒佢地啲鬼屋可以買「恐怖之夜快証4」¥4,900,如果有定心理準備玩埋「Trauma 2 最恐怖實驗病棟」就可以買「恐怖之夜快証5」¥7,300 會有埋Trauma 2嘅門票,點解我會講有定心理冷準備呢?因為Trauma 2會係密閉空間裹面、遊客手腳將會無法動彈完全束縛嘅狀態、進行超絕恐怖嘅體驗。遊客仲會將成為人體實驗對象,接二連三不斷襲來恐怖感將畢生難忘,遊客將被逼入視死如歸,毫無退路的極限狀態 !係咪睇到介紹都覺得恐怖?仲話只願意承擔受到心靈創傷風險嘅人,先好挑戰超越恐怖極限嘅體驗喎!所以玩之前真係要認真考慮呀!如果想玩返啲輕鬆啲嘅就可以買「恐怖之夜快証3」¥3,600啦!


邊到買門票同快証
入場門票好多地方都可以買得到,甚至香港仲會平過USJ官網買添(要睇匯率),如果想係香港買快証就要去旅行社或者其它售票網買啦,但價錢方面會比官網貴好多,因為又方便又唔需要煩!而去USJ官網買步驟比較複雜,又要日本地址又要日本名,所以好多人都會唔想煩再係香港買快証。但係有好多快証香港都無得買或者選擇唔多,唔緊要嘅!下面我會有個USJ官網訂票教學,睇教學之前我整咗個價錢比較,比大家個一個參考!香港未有USJ萬聖誕快証買所以未能加入比較表!

▲如果計是日匯率(7.65)計係香港嘅新怡旅行社最抵,但如果快証的話一定係官網平好多啦!


USJ官網訂票教學

▲一般香港人都唔會知道自已嘅日本名,唔緊要可以上網搵翻日本名(日本片假名)嘅網站搵自已嘅自已名出嚟㗎!
我推薦可以用依個 中文轉日文片假名網站,可以好清楚睇到邊個日文係名邊個日文係姓,一定唔會打錯資料!


▲手機號碼可以打返自已嘅電話號碼,不過記得要加返地區號碼 例如: 香港地區號碼 852
而日本電話號碼可以打酒店或民宿電話㗎!


▲地址郵政編號可以去依個 搜尋日本郵政編號網站,打返酒店或民宿嘅地址就可以搜尋到㗎啦!
而都道府縣呢,一般去得日本環球影城都係住大阪㗎啦,大家可以揀返大阪府就得啦!


另外仲有一個係環球影城嘅VIP入場證,如果你哋係會等樂園開門想早啲入去玩的話,依張VIP入場證就啱你地啦!因為樂園開門入場時會一個一個睇門票同入場需時都幾長,但如果你有VIP入場證呢,工作人員就會係開門前先檢察好晒門票,開門時就唔需要再慢慢等入場,可以第一時間衝去你地想玩嘅遊戲,第一個遊戲就唔洗排咁長隊啦!但如果你地打算晏啲先入樂園玩的話,就無需要依個VIP入場證啦!


▲VIP入場證可以係有冷氣嘅Tax Free Shop到等入場,相中見到普通入場証嘅人仲排緊隊等入場,但VIP入場証已經優先入緊樂園啦!


▲香港日航天地旅遊都可以買到VIP入場証,價錢HKD$740連入場券、VIP入場證、HARUKAS 300展望台嘅入場卷!(上次介紹嘅HARUKAS 300 Blog 可以睇返㗎) HARUKAS 300展望台單買門票先要¥1500,所以想早d入場玩嘅朋友買依家組合都幾抵㗎!

今次日本環球影城門票同快証全攻略就差唔多啦,希望我依個少少分鐘可以幫到大家啦!祝你地去環球影城玩得開心啲啦,下個Blog見!