「狂掃平靚正生果」 油麻地果欄 5大抵買生果

 

買生果最緊要係新鮮，果欄嘅生果就最新鮮！識買嘅話，用市價一半，甚至三分一價錢就可以買到當造靚生果㖭。另外，果欄提供嘅生果種類超多，單單係橙就有幾十個品種畀你慢慢揀，食得講究嘅仲有機會搵到市面較少見嘅品種！如果想去果欄買生果，記得留意食用份量，最好可以搵到朋友一齊夾，平啲之餘，唔怕食唔晒造成浪費啦。雖然果欄主要做批發生意，不過有唔少檔口都提供零售，各位想買平生果嘅朋友係時候出動執平嘢喇。

掃貨小貼士

1.逐一格價：同樣嘅生果，每檔售價都唔同，個人經驗係曾經見過位置比較入嘅鋪頭賣嘅日本士多啤梨會比前面鋪頭平＄20／盒，所以建議行晒所有鋪頭先決定入手。

2.要問可否試食：好多檔都有姐姐喺檔口提供試食，態度勁Nice，大家唔使怕醜，可以試食完先決定買唔買。

3.只收現金：好多檔都唔收卡，記得帶現金呀。 5大抵買生果 1.韓國秋田梨

果欄價：＄10／個 市區價：＄28-30／個

抵買原因：平！！！＄10一個大過拳頭嘅秋田梨，唔買點對得住自己？而且水份飽滿、甜度足、生津解渴，就咁生食或者煲糖水都得。

2.紐西蘭黃金奇異果

果欄價：＄2.5-3／個 市區價：＄4-5／個

抵買原因：平！！！金奇異果比青奇異果甜，而且營養成份高啲，所以價錢比青奇異果貴！市區價有時候浮動到＄6／個，所以好多人去果欄一次過買成箱同人Share，計返只係＄2.5-3／個，身邊同事聽到都雙眼發光。

3.日本王林蘋果

果欄價：＄8.3／個 市區價：＄14／個

抵買原因：平！！！特別要講果欄王林蘋果Size比超市賣嘅大一倍，所以喺果欄買係抵上加抵。王林蘋果表皮冇上蠟，所以可以連皮食，更有營養！因為蘋果皮所含嘅纖維佔成個蘋果五成咁多，同時有鉀、維他命A、C、E、黃酮等營養。

4.南非珍寶梨

果欄價：＄3.75/個 市區價：＄6/個

抵買原因：平！！！而且含有大量果酸，有清熱解渴、美容養顏嘅功效。聽講仲可以促進胃酸同胃消化酶嘅分泌，增加腸胃蠕動，預防便秘。

5.日本熊本縣「露之水滴」士多啤梨

果欄價：＄45/盒 市區價：＄70/盒

抵買原因：平！！！「露之水滴」只有熊本縣可以出產到，用咗8年時間，由「幸之香×栃之峰」和「久留米54號×栃之峰」之品種選咗最優良品種去配種而成。果實偏大，顏色鮮艷有光澤，食落果肉結實，糖度高、酸味少，糖度約13～15度，都幾香甜！

果欄資料：

地址：油麻地新填地街口至石龍街 零售開放時間：星期一至日(09:00-18:00)

相關文章

現金回贈信用卡比較 信用卡超市優惠