特首成績表! 有野say!

<高sir 隨筆> : 今日睇識既, 梗係睇呀梁特首係電視推佢份施政報告啦, 開電視睇到梁特條紅色領呔, 就知特首愛國心有幾重! 茶實, 筆者好少係電視機前, 坐低低睇完一個完整節目, 日前, 「毛記電視」的「十大勁曲金曲分獎典禮」是其一, 而幾日後今天, 一年一度的施政報告為其二. 兩個節目, 一個改歌創新有創意, 笑中有淚! 今日呢個陳舊節目, 幸好仲有「長毛」, 「大舊」呢班老演員係度, 唔係就悶爆。
 

又咁講, 無論你幾唔鐘意呀「梁特」, 但如果你係關心香港, 又或你有投資開股票, 地產, 甚至在職打工仔, 都不得不關注下特首份施政, 因為對你未來投資方向, 買樓, 或打工仔的工作前景有一定性啟示. 本年度, 施政報告看來著墨了過多「一帶一路」, 「高鐵」等所帶來的商機, 也有提及, 配合內地「十三五」規劃, 香港能夠發揮超級中間人的角色等云云。

就以上偉大宏觀的經濟視野, 作為小市民的話, 什麼「一帶一路」, 「高鐵」「十三五」等這些經濟憧憬, 其實好話唔好聽, 連點「picture」 個畫面都未知, 講到有幾好前景和利潤.  OK 既, 但講到尾只係憧憬, 高鐵連幾時完我都picture唔到, 仲講利潤!? 個「一帶一路」更加唔好提啦, 筆者只係知隻中國中車(01766)由$16一路跌到今日得番$7.8, 幾乎車毀人亡!

重點睇睇房屋, 今回施政報告終可大大聲講一句: 「我得左了」! 梁特話樓價在政府努力下, 稍有曙光! 哇! 聽起上黎好似近排樓價跌, 呀梁生有所功勞! 喂! 又關你咩事先!? 樓價跌係阿爺見你攪來攪去都唔掂, 唯有整爆個股市, 攪死埋個人仔, 「幫」到你盡先落咋嘛! 阿爺既功勞都咁搶!? 條紅領呔未必撐得住嫁番!

中肯少少咁睇, 施政報告預計, 未來3-4年供應量為8.7萬個, 為2004年新高, 未來5年, 公營房屋為9.7萬個, 筆者好中肯, 比番個「like」梁特, 供應持續輸出, 這樣才可把一直以來高地價, 高房價的形勢去逆轉, 看來香港樓市在未來幾年, 除左因為大環境經濟向下而調整外, 也要慎防梁特呢幾年所鋪排的越來越多供應額而來一個深度調整! 才不要忘記, 梁特當年同「老董」拋出一個「八萬五」計策, 令香港樓市方向由牛轉熊市, 十多年後, 其實是重施故技, 樓市自求多褔, 冇情面講的!

文: 投資理財寫作人 – 高俊權