火險（樓宇結構保險），與及家居保險，由於都係同物業有關嘅保險，所以經常被混淆，實質係兩種完全唔同嘅保險嚟。究竟火險同家居保險有咩分別？火險係咪做按揭就一定要買？火險去邊度買最平？本文一次過話你知。
火險｜與家居保險分別
以下係火險 同 家居保險 嘅詳細比較，可以見到兩種保險係完全唔同，特別係保障範圍，火險係保障樓宇結構同唔同災害對結構嘅影響，而家居保險主要係屋企財物同埋一啲生活實用嘅保障。兩者並不相同，但又能互相補足，兩樣加埋先可以對屋企構成較為足夠嘅保障。
| 火險 | 家居保險 | |
|---|---|---|
| 保障 | 樓宇結構、火災、淹水、雷擊、爐具或煤氣爆炸等 | 家居財物、裝修保障、換窗換鎖、個人意外等，個別更提供家電維修、寵物保障等額外保障 |
| 第三者責任 | 不保 | 個別家居保會有保障 |
| 保費計算方法 | 保費率，即投保額之一定比率 | 以單位面積、投保額、額外保障項目等因素而定 |
| 自負額 | 無 | 一般都有 |
| 購買原因 | 做按揭通常都必須購買 | 為家居財物增添保障 |
| 邊個買 | 管理公司／業主 | 業主／租客 |
火險｜做按揭通常都必須購買
有買過樓嘅朋友相信對火險唔陌生，基本上買樓申請按揭時，通常都必須要買埋火險，你話唔買得唔得？除非你個物業，已經有管理公司包咗集體火險，你先可以向銀行出示證明自己唔使買，否則都要買完銀行先會批按揭。因為你係抵押緊層樓畀銀行，銀行自然需要你有火險去抵消因樓宇結構問題而令物業貶值嘅風險。
就算你full pay買樓，或者已經供甩層樓，其實都應該考慮買火險，以cover相關風險。
火險｜投保額要幾多先夠？
市面上火險投保額流行以下3種計法，你可以自行決定：
- 按揭總額
- 目前剩餘按揭額
- 物業重建費用
大部份人都會揀2：以目前剩餘按揭額作為投保額。
火險｜保費以保費率計算
火險嘅保費計法相當簡單，每間保險公司嘅火險計劃都有一個保費率，你以自己嘅投保額乘以該火險計劃嘅保費率，就係你嘅火險保費（一年）。
以OneDegree火險保費率0.038%為例，投保額HK$5,000,000，即全年保費為：
HK$5,000,000 x 0.038% = HK$1,900
另外要留意，保費以外，你仲需要交保險業監管局收取嘅0.1%保費徵費（最高HK$5,000）。
以上資料由Universal Alliance Group Limited提供