《澳門無厘頭》之最短、最奇、最正宗!

《澳門無厘頭》之最短、最奇、最正宗!

相關信用卡:

《澳門無厘頭》之最短、最奇、最正宗!

發表日期: 2015 年 12 月 04 日 更新日期: 2015 年 12 月 04 日 旅遊

作者:Stella Ma

全球最短的纜車!松山纜車
「松山纜車」除了係全世界最短嘅纜車,亦是澳門唯一一個纜車系統,由山腳去到山頂,全程只需1分20秒,搭一程要 $2,來回兩程車費都只係要 $3。

注意喇!想體驗松山纜車就要識揀日子,因為呢個纜車逢星期一唔開㗎!事關纜車要進行例行維護,另外如果星期一係公眾假期,星期二會補假,姐係都係唔開。由於我地去果日,好唔好彩係補假,所以無搭到!如果唔係,搭到上去就可以睇晒澳門全景喇。




有同事最近去左澳門,仲去左搭松山纜車,上到去纜車位就係咁樣架啦~

松山纜車(★★★☆☆ 我之前去澳門嘅時候搭過,坐上全世界咁短既䌫車都幾搞笑架)
開放時間:8:00am - 6:00pm(逢星期一休息)
票價:單程 $2; 雙程 $3

創新 8 字型摩天輪! 影滙之星
以為今次睇唔到澳門全景,點知原來新濠影匯酒店裡面個摩天輪,一樣飽覽澳門景色㗎!酒店裡面有摩天輪已經好盞鬼,而且呢個摩天輪嘅外型,仲要係全球獨一無二的嘅8字形!呢個全球最高的8字形摩天輪,一共有17個帶復古味既科幻主題觀景廂,每個可容納 10 人,觀景廂嘅部分地下更設有透明玻璃,滿足一班鍾意刺激既朋友。

我們捕捉到黃昏時間搭摩天輪,景色真係超級靚!之後我地仲特燈喺夜晚搭多咗次比較下景色,其實夜景雖然都唔錯,但個人就鍾意黃昏多啲,而且最緊要係少人排隊,建議大家可以係夜晚去睇,順便影返張「呃Like相」。


黃昏~


夜景

影滙之星 (★★★★☆ 買酒店套票包埋的話,絕對抵玩!)
營運時間:星期一至五 12:00pm-8:00pm;星期六、日及公眾假期 11:00am - 9:00pm
票價:成人 $100;12歲或以下小童 $80

無添加味道!關東煮手作坊 Oden Studio
日本料理相信各位食唔少,但只係得關東煮食既日本食店你又試過未?由日本人主理,親自挑選由日本直送食材、湯底花上16個小時製作,甜品即席親自製作⋯⋯在呢個「速食」既年代,睇到以上既說話,以為自己眼花;但親自試食之後,就深明店主的用心,真係無花無假。


根據店主的「飲食指南」第一點,要先飲湯!湯的味道十分清甜,完全不帶油膩感。真心講句,飲多幾碗都無問題!呷一口湯之後就可以食各款食物,店主親自調配醬料比客人沾關東煮黎食,我地當日可以試到「咖哩」同「梅子味增」兩款醬料。論關東煮最見功力嘅食物一定非「大根」(蘿白)莫屬,一定要煮得入味,蘿白有苦味又或蘿白心未煮熟透都令我怕怕。


根據店主的「飲食指南」第二點,先沾少少醬料,但千其唔好將已沾醬料的關東煮放入湯(雖然無講點解,但我估計係唔想令本身既湯混入其他味),再咬一口,蘿白嘅汁即刻溢出。食落口,蘿白真係真係好清甜同勁多汁,無得彈呀!


最後,我們叫左一份今期限定嘅「抹茶紅豆大福」,其實由我們入到舖頭,就見店主係度整緊呢個甜品。所以我係十分之期待,結果味道真係十分不得了!「大福」面有一層抹茶粉,味道帶甘且澀;和內層甜甜既紅豆泥形成強烈對比,最後你仲會食到白滑忌廉,正呀!


老闆仲會係店內播放日文歌,成個感覺真係好似去左日本咁,每日開放時間略有不同,比大家做個參考,我地去果日晏就晝5:30 開~不過如果想要準確啲,大家最好係 Facebook 或者打電話( +853 2835 0201 )去問一問。

關東煮手作坊 Oden Studio(★★★★★ 真係好好好食!位置雖然難搵,但你去左食完就知,無!去!錯! )
地址:澳門先刂雞街41號永昇大廈43號地鋪
營業時間:約6:00pm - 10:00pm
聯絡電話:+853 2835 0201

去片~

=========== ⊙⊙ ===========
如果想了解我多點,不妨到我的 FacebookInstagramYouTube 看看。
多謝瀏覽 ☺ 下回再見