澳門氹仔．覓食之旅

 

講到去澳門相信大家都會諗起賭場同美食，其實去澳門周圍都可以食到好嘢㗎！就例如氹仔官也街啦，個到除咗買手信之外，搵好野食真係完全無難道，如果大家“快閃”澳門又唔想再去大三巴咁悶咁逼的話，氹仔官也街真係一個唔錯嘅地方㗎！今次我同我嘅好姊妹沙律就去咗氹仔同官也街“快閃”搵咗幾間必食小店同隱世咖啡室！唔知啱啱大家口味呢？！HAHA

1.莫義記

地址：氹仔舊城區官也街9號A舖

食物：貓山王榴槤雪糕 $68

個人評分 : ★★★★★  (5星滿分)

▲去澳門食榴槤雪糕都一定會去「莫義記」，但唔知大家知唔知莫義記嘅榴槤雪糕都有分兩種呢？第一隻就係D24榴槤雪糕，第二隻就係全店皇牌嘅貓山王榴槤雪糕啦！
「D24榴槤雪糕」就唔會榴槤果肉，但係雪糕口感香滑超非常creamy，而「貓山王榴槤雪糕」就會有榴槤果肉，全杯雪糕都好似食緊真正嘅榴槤咁，榴蓮味濃得黎又唔會太甜！老板仲話佢地啲榴槤雪糕係每日新鮮制造，仲拎埋2016米芝蓮澳門指南添，勁呀！

 

2.蜂大咖啡(澳門店)

地址：氹仔舊城區消防局前地1號地下

食物：冰滴咖啡 $24 ，榛子拿鐵咖啡 $28

個人評分 :

冰滴咖啡          ★★★★★  (5星滿分)

榛子拿鐵咖啡   ★★★★★  (5星滿分)

▲蜂大咖哩總店係台北西門。澳門分店嘅店主Lamgo去台灣蜂大咖啡始創人之子曹先生拜師學藝後，就帶咗依門手藝嚟到澳門啦！冰滴咖啡係要放置幾日先整到嘅，係佢地店最出名嘅咖啡好多人都為咗佢再嚟㗎！而榛子拿鐵咖啡比冰滴咖啡甜少少，都一樣都好香濃香濃，如果你地鐘意咖啡嘅香濃少少苦澀咁可以試下冰滴咖啡，而我Stella好少飲開咖啡就鍾意比較甜嘅榛子拿鐵咖啡啦！但價錢方便真係好性價比高㗎！

 

3.新好利美食餅店

地址：氹仔舊城區地堡街13-14號

食物：葡撻 $12，燕窩蛋撻 $16

個人評分 :

葡撻             ★★★★☆  (5星滿分)

燕窩蛋撻      ★★★☆☆  (5星滿分)

▲「新利好」嘅撻係氹仔都幾出名嚟，我地點咗葡撻同燕窩蛋撻全部都係新鮮熱辣，燕窩撻嘅面頭仲一絲絲嘅燕窩，奶味好香濃。而我個人比較鍾意葡撻，蛋漿有好香滑嘅蛋味。酥皮方面夠晒鬆化，去氹仔真係好值得一試㗎！

 

4.誠昌飯店

地址：氹仔舊城區官也街28-30號

食物：招牌水蟹粥 $180 ，酥炸鯪魚球 $70

個人評分 :

招牌水蟹粥  ★★★★☆  (5星滿分)

酥炸鯪魚球  ★★★☆☆  (5星滿分)

▲我地咗細嘅水蟹粥都有5-6碗嘅份量，粥裹面有一整隻嘅蟹，而粥充滿咗蟹膏超級足料，因為超多蟹膏嘅關係食落去先好鮮甜！

 

▲依個酥炸鯪魚球超大粒，食落去好彈牙而唔會有鯪魚嘅腥味！

 

今次我同沙律“快閃”澳門氹仔就分享到依到啦，下次再帶大家去食食食同食啦！