港鐵黃埔站 • 美食放送
港鐵黃埔站 • 美食放送
相關信用卡:

港鐵黃埔站 • 美食放送

發表日期: 2016 年 11 月 11 日 更新日期: 2016 年 11 月 11 日 飲食
作者:Stella Yeung

最近港鐵就開通咗黃埔站同何文田站,交通方便咗咁多梗係要搵下有咩好食啦!今次第一站先去黃埔,其實黃埔係屬於紅磡區,附近嘅美食真係多到不得了,是但行一轉已經搵到好多唔同嘅小食店,仲有好多老字號嘅食店添。快啲睇下有啲咩正嘢推介啦!

 

正宗港式漢堡包 - 時新快餐店

地址:紅磡黃埔街1A地下

食物:雙層漢堡芝士蛋包 $23

個人評分 : ★★★★☆  (5星滿分)


▲我叫咗雙層漢堡芝士蛋包有兩塊漢堡扒,仲有一塊超厚嘅煎蛋,再加上佢地嘅祕製沙律醬,超豐富呀!牛肉好鬆軟聽講係以新鮮牛肉用人手壓制而成㗎!佢地60年代開業到依家,唔好睇佢地裝修咁懷舊,平時都好多大學生嚟食㗎!

 

超邪惡熱狗 - ICONIC H 特色熱狗店

地址:紅磡必嘉街97號黃埔唐樓C座106A舖

食物:草飼和牛漢堡狗 $88 另加芝士 $10 ,

個人評分 : ★★★★★  (5星滿分)


▲其實我都係一位熱狗愛好者,對熱狗都好有要求㗎!依間熱狗店有好多特色熱狗,今次我就叫咗份草飼和牛嘅熱狗仲另加咗芝士,和牛超級正,好腍好香和牛味,同個熱狗100%夾呀!除咗和牛,熱狗腸,芝士之外,仲有菠蘿係入面,菠蘿酸酸甜甜非常開胃,正呀!依個熱狗雖然價錢唔平,但佢地嘅食物質數好高同份量超大,絕對值依個價錢㗎!

 

足料豆腐花 - 一豆花

地址:紅磡船澳街99號地舖

食物:薏米銀杏豆腐花 $11

個人評分 : ★★★☆☆  (5星滿分)


▲一豆花有好多唔同既選擇,例如有淡奶、芝麻、紅豆等等就連醬油味都有,所次我就擇個最補最多料嘅薏米銀杏啦,佢地嘅薏米好煙靭,可能因為薏米銀杏嘅關係,豆花完全夠晒甜味唔需要落糖水,而豆花又香又滑,好抵食呀!

 

超抵水果班戟 - 紅磡雞蛋仔

地址:紅磡大沽街寶利閣2號舖

食物:雜果香蕉班戟 $10

個人評分 : ★★★☆☆  (5星滿分)


▲依間紅磡雞蛋仔超多人排隊呀!好多人都係因為伯伯嘅雞蛋仔同班戟而嚟,仲讚伯伯嘅芒果班戟好食同足料多芒果,但今次我就貪新鮮試咗個雜果香蕉班戟,香蕉佢係用新鮮香蕉嚟整,加埋熱辣辣嘅班戟令香蕉稍為溶化,口感超正!依個雜果香蕉班戟都只係十蚊,平到無朋友呀!

 

 

今次就分享完黃埔嘅美食啦,下一站就係另外一個港鐵嘅新車站 - 何文田啦!我地下星期再見啦!byebye