港男與港女

港男與港女

相關信用卡:

港男與港女

發表日期: 2014 年 07 月 18 日 更新日期: 2014 年 07 月 18 日 購物

作者:Lady C.

「港男」同「港女」呢個話題 (大家見我括住,就知我係指某一小撮人,而唔係指全部香港男性同女性啦),喺網上面嘈極都仲有得嘈。港女式現代愛情電影《分手100次》就嚟上畫,引起我興趣嘅係我嘅「愛人」鄭伊健,有佢份嘅戲,唔理有咩卡士,我都會照睇。



戲入面伊健同周秀娜係一對,每當有咩事,周秀娜就會嗌分手,伊健就會死死地氣認錯求饒。令周秀娜變本加厲。都咗第99次,兩個人終於決定唔再隨便鬧分手,並且認真為將來打算,開咗間Coffee Shop。而個故事就圍繞住呢間Coffee Shop發展,其中當然係「厚多士」,令兩個人面臨第100次分手。


我好羨慕娜姐......


除咗伊健之外,Lady C.對劇中女配角王菀之亦有啲期待,由《老表,你好嘢!》到《金雞SSS》,真係估唔到表面斯斯文文嘅王菀之都可以咁搞笑,可能因為反差愈大,喜劇感愈大。套戲8月1號上畫,喺屯門市廣場用電子貨幣消費可以換戲飛,不過Lady C.好日都唔入一次屯門,冇我份。


王菀之同呢套戲嘅導演鄭丹瑞,主題曲《不再説分手》都係王菀之唱。


其實未睇套戲,見到Poster上面有句Slogan「一定錯先生决鬥永遠啱小姐」,即時諗起一個無理取鬧嘅「港女」,食住一個奴隸獸「港男」。我有個男性朋友,佢對佢女朋友千依百順,有一次情人節,佢當然買咗一大紮花同禮物,訂好晒枱食飯,佢女朋友就因為間餐廳唔啱佢嗰日嘅口味而當場發脾氣,掉咗紮花落地,然後轉身就行咗去。男性朋友只好尾隨不停氹佢,搞咗好耐先求其搵過另一間餐廳再食。Lady C.都明白有啲女仔係好重視呢啲節日,不過既然男朋友已經安排好晒,又唔係求其,咪順下佢意囉,即使當下真係好唔想食,咪平心靜氣講出嚟囉,再搵其他嘢食,亂發脾四真係好乞人憎㗎。最近,男性朋友終於都頂唔順,同佢分手,我哋一班朋友都拍晒手掌恭喜佢。奉勸各位姐妹,凡事唔好太盡,否則緣份勢必早盡呀。