淘寶買嘢點慳手續費？

積克買電腦鍾意DIY，但有啲配件即使香港有代理，亦未必會引入晒所有Model，要上淘寶搵，特別係機箱同散熱器。喺淘寶買嘢俾錢，有幾種方法，例如國際信用卡、快捷支付、支付寶購物卡、八達通、PPS繳費靈、同埋搵人代充值等等。

而每種付款方式都會收唔同手續費，例如國際信用卡通常係3%，快捷支付由1.5%至3%，八達通同PPS都係1.5%，睇落似乎係八達通同PPS最抵，但限額比較低。而買支付寶購物卡同好多代充服務都唔收手續費，但就會係匯率賺返。

如果想用信用卡俾錢，可以考慮用中銀同信銀國際做快捷支付，因為手續費係1.5%。另外富邦做快捷支付手續費亦係1.5%，簽賬可以儲積分，每満港幣$300仲有多5,000分，最多可以賺多20,000分。不過佢呢個優惠到7月31號就完，好彩$300唔算多，多多少少都仲賺得切。