梅窩居屋 最平首期7萬上車

梅窩居屋 最平首期7萬上車

相關信用卡:

梅窩居屋 最平首期7萬上車

發表日期: 2017 年 02 月 16 日 更新日期: 2017 年 02 月 16 日 生活

作者:甦師父

房委會推出新一期3個居屋項目,其中梅窩嘅屋苑,最平單位唔使$7萬就可以上車!現時私樓樓價高,拉高巿區居屋樓價,梅窩會唔會係貧苦青年上車嘅唯一機會?

梅窩單位$139萬

房委會推出嘅3個屋苑,分別係彩虹彩興苑、梅窩2個屋苑銀蔚苑同銀河苑,最平嘅單位位於銀蔚苑,售價只係$139萬。

居屋唔同一般私樓,綠表人士可以做到高達9成半按揭,白表最多只有9成按揭,即係買銀蔚苑最平單位,綠表首期只需要$6.95萬,白表係$13.9萬,隨時係全城門檻最低嘅上車盤(下表)!房委會最快下月底接受申請,6月攪珠,8月可以揀樓。

▼最平單位,綠表只需$7萬首期有找,月供$5,700就買到

單身未必輸蝕

唔好以為$139萬上車咁筍,單身人士抽中都揀唔到,事關雖然家庭優先揀樓,但據以往經驗,一家大細都係揀大單位多,所以單身反而有機會買到平樓。

至於申請資格,單身人士入息同資產限額分別係$2.6萬同$85萬,家庭則分別為$5.2萬同$170萬。因為綠表人士本身有公屋住,之前幾次綠表人士申請比例都低,今次綠白表比例維持1比1。

方便中環返工

梅窩嘅屋苑售價咁低,原因係梅窩位處離島,出入巿區只可靠船,睇落唔係咁方便。

不過銀蔚苑只係距離碼頭5分鐘腳程,銀河苑都係10分鐘,而快船一程來往中環約40分鐘,即去港島返工隨時只需要1個鐘,快過唔少新界地區出中環。

要注意嘅係,銀蔚苑為單幢式屋苑,管理費會較高。2014年大澳天利苑開售,就係因為單位少同位置偏遠,管理費每戶超過$2,000,每呎$4.27,貴過豪宅。

▼兩個屋苑距離梅窩碼頭分別係5同10分鐘(新渡輪圖片)

巿區居屋貴百萬

新一期放售嘅居屋屋苑除咗彩虹同梅窩呢3個,仲有35個回收嘅沙田、荃灣,沙田同元朗單位,不過最平都要$245萬,比梅窩貴超過$100萬。

梅窩雖然被巿區人嫌遙遠,但現時巿區樓價高居不下,百幾萬可以上車呢個希望,巿區冇可能發生架喇,睇怕呢個係一眾貧苦青年上車嘅唯一機會。

▼巿區居屋售價遠高於梅窩居屋