林祖輝專訪:做零售要「細眉細眼」

林祖輝專訪:做零售要「細眉細眼」

相關信用卡:

林祖輝專訪:做零售要「細眉細眼」

發表日期: 2017 年 01 月 11 日 更新日期: 2017 年 01 月 11 日 生活

作者:甦師父

睇過90年代亞視王牌節目《今日睇真D》嘅人,一定唔會對林祖輝感到陌生。佢離開電視台工作後,一度到內地做大公司嘅高層,近年回港經商做老闆,進軍童裝界,代理多個國際童裝品牌。嚟到HongKongCard會客室,林祖輝大談佢嘅「retail就係detail」零售營商哲學,仲分享喺繁忙嘅工作中,點樣平衡家庭生活。

採購要信大數據

林祖輝公司Rookie代理Jordan、Nike、Converse同Levi's等國際童裝品牌,零售同批發點遍佈全港,連大型體育用品公司同百貨公司都需要透過佢間公司入貨。今日生意上嘅成功,之前從未做過採購嘅林祖輝坦言,選擇入咩貨一啲都唔容易,「講眼光,冇人知道眼光準唔準確,好似今年興紅色,出年興藍色……例如鞋嘅尺碼,你點估?銷售量方面,6C可能賣10對、7C可能賣20對、8C可能賣5對,另一個尺碼可能30對。你點捉到果個數值範圍?好難!」

銷情難以估計唔代表入貨上無法可依。林祖輝選擇參照「大數據」嚟入貨,先預測未來生意額同每間分店嘅銷量,再按預算進行採購,「根據過往衫同鞋、男女童裝嘅銷售比例,同埋唔同年齡層嘅分布,落實訂乜嘢貨。」

唔單止咁,林祖輝喺專訪前嘅1個月去咗紐約,喺當地睇咗總公司嘅2017年秋冬童裝時裝表演,了解來年嘅童裝潮流,「果次大開眼界,連藍球明星柏賓同雷.阿倫都喺度……果啲(童裝)資訊對我哋有好大幫助。」

▼林祖輝喺九十年代擔任《今日睇真D》記者而形象入屋。

Retail就係detail

林祖輝透露,每開一間分店嘅成本要7位數,依家一共6間鋪,喺人流同消費力方面各有不同,所以喺揀鋪上好小心,「一間鋪要簽2、3年租約,連埋裝修,開支其實好大,錯咗,再行過,咁好嘥資源。」簽租約前,佢會睇清楚鋪面日頭同夜晚嘅情況,連周末都唔放過,觀察人流同消費力係咪真係適合開分店。

做零售行業,除咗講求產品係咪切合客人需要,同埋店鋪位置係咪針對客源外,仲需要兼顧無數細節,林祖輝記得,一名喺零售大集團做高層嘅舊同學曾經對佢講過,「retail就係detail」,「做零售就係要做啲細眉細眼嘅事」。

「retail就係detail」呢句說話已經成為林祖輝嘅營商哲學,而做零售「細眉細眼」令佢盤生意順風順水,「你整體好似好得,但細節唔得,果度爭少少,做少幾千蚊生意,果度又做少幾千蚊生意,夾夾埋埋就係賺錢或蝕錢嘅分別。」

▼位於ISQUARE嘅分店

等仔女瞓咗先繼續工作

因為工作「細眉細眼」,工作佔據林祖輝每日唔少時間,但佢唔會因為咁而忽略家庭生活。林祖輝平日會喺辦公時間開會、接見客人等等,到夜晚就返屋企陪對仔女,等到佢哋9點鐘左右瞓咗之後,先至處理日間未完成嘅文書工作。

不過到咗周末,林祖輝可以帶子女去巡鋪。佢發覺小朋友識得揀自己鐘意嘅服飾,對店鋪環境亦有喜惡,有時候仲唔覺意「提點」林祖輝改善店鋪佈置,「原來阿仔呢度撼親,呢到要小心啲,因為阿仔撞親,其他人嘅阿仔都會撞親。」

唔少人做生意搵到錢,會將盈餘用嚟買股票或物業投資,但林祖輝冇咁做,佢話,有啲人做生意賺到錢就「身痕」,新增第二同第三業務,結果唔少情況係因為生意擴張得太快,「整壞」公司整體嘅營運,「全世界一直發生呢種悲劇,香港都太多呢啲個案。」

講起悲劇,亞視出身嘅林祖慨嘆亞倒閉嘅悲劇。下一篇blog,林祖輝將會大談佢對亞視嘅樂與怒。