東華極光飄雪嘉年華 18號於黃大仙摩士公園開幕

舊年東華慈善嘉年華喺啓德機場舉行，有好多明星撐場之餘都好受市民歡迎。今年東華又搞嘉年華啦，仲要配合聖誕主題，名為「東華極光飄雪嘉年華」。呢個嘉年華轉咗喺黃大仙摩士公園游泳池舉行，仲係免費入場。由12月18號開始到17年1月14號先結束，特別喺24號同31號都會開到凌晨。

第一次見嘉年華場地係由游泳池改建而成，所以十分期待。唔知係場地限制定係活動定位嘅關係，嘉年華偏向輕鬆類型，冇乜刺激遊戲。除咗有50呎闊乘10呎高嘅大銀幕造成飄雪效果，仲有歐陸小鎮同鐘樓可以俾你影相打卡。

而想玩遊戲嘅話可以體驗一下VR虛擬實境體感遊戲同大型充氣彈床，就算帶埋一家大細都岩玩。講到嘉年華又點可以冇嘢食？當中設有美食攤位，有唔同地方嘅美食提供，玩完可以盡情食，仲可以一邊睇舞台匯演。

日期:2016年12月18日 - 2017年1月14日 下午3時至晚上9時30分

地點:黃大仙摩士公園游泳池   

票價:免費入場

特別開放時間:12月24日（下午3時至凌晨12時15分）、12月31日（下午3時至凌晨12時15）