無綫節目《有樓萬事足》2月20日首播,但早已漏晒口風話有女士嘅擇偶條件要有樓,仲要好似何文田2,000呎舊樓單位咁 。粗略計算後,香港只有4%男士嘅收入供得起類似嘅單位,做得起佢男朋友!
首集出現嘅將會係22歲女Seasun。唔知係咪做珠寶公司職員,見得多鑽石王老五,所以擇偶條件都特別高,要求另一半要有樓,「覺得2,000零呎都差唔多,例如何文田舊樓」,仲話,「冇樓嘅話就唔好白撞」,「有樓有高潮」!既然佢公開佢嘅要求,筆者就幫佢計吓,有幾多港男可以畀佢揀。
▼睇咁大本書嘅Seasun,擇偶條件一啲都唔低
月入8.2萬先供得起
筆者查過,何文田有個建築面積2,000呎、實用面積1,625呎嘅舊樓低層單位,要價$1,800萬,價錢可以話係該區數一數二低,同時符合Seasun嘅擇偶嘅最低門檻。
呢個單位由於過千萬,最多只可做5成按揭,即係首期要$900萬;粗略計算下,假設畀你供足30年,每個月供款要$3.4萬之餘,月入仲要高達$8.2萬先過到壓力測試(假設按揭利率上升3%),銀行先會安心借錢畀你買樓追求Seasun(下表)!
▼供得起,先好向Seasun求愛啊!
僅4%港男合資格
據統計處資料,港男月薪中位數只有$1.67萬。不過又唔使戥Seasun感到太灰,事關月入過8萬嘅港人都有10.96萬人,保守估計當中7成係男人嘅話,粗略計算可能有7.7萬名男士嘅月入供得起$1,800萬嘅單位,合資格做Seasun嘅另一半!
不過呢7.7萬名「男人中嘅男人」,只係佔咗全港193萬男性勞動人口中嘅4%,仲有唔少已經結咗婚添,以Seasun嘅條件,唔知大家覺得佢會唔會搵到合適對象?
唔用份糧 要儲90年
各位貧苦青年可能對$1,800萬呢個數字感到模糊,不如筆者從另一個角度計算吓。以港男月薪中位數$1.67萬計算,份糧唔食唔用,要儲1,078個月,即近90年先夠錢買到何文田呢個單位。
「貼地少少」計算,假設港男20歲仔開始做嘢,平均要月搵$3.33萬,做足45年,份糧唔食唔用,65歲退休時就可以入手單位,向Seasun求愛了,唔知大家覺得值唔值?