昔日情懷重現中環

對於我哋呢啲八、九十後，講懷舊其實可能只係十幾年前嘅事，同而家相差唔係太多，記憶仍然好清晰。但係對於長輩嚟講，又係另一回事。睇返阿爸阿媽、阿爺阿嫲啲舊相，喇叭褲、迷你裙、鬆糕鞋、飛機頭，可能因為冇親身經歷過嗰個年代，我覺得好新鮮，反而唔覺得佢哋 Out，仲好型。

遲啲喺中環新海濱有一個老爺車展同復古嘉年華。主打係會展出超過100架經典老爺車同電單車，亦會定時喺場內巡遊，亦會展出本地藝術家以老爺車為題材創作嘅藝術品。另外由專業人士講解嘅工作坊同講座，會解釋老爺車構造同性能。同場亦會有遙控玩具同高卡車俾小朋友玩，大小車迷應該唔會錯過。

此外，參觀者可以著住懷舊衫出席，因為大會設有最佳復古裝扮大獎，後生一輩可以問長輩借衫。如果借唔到，現場亦會有專人幫你設計復古髮型同裝扮，同埋可以即場買或租懷舊衫，盡情投入。自認舞王嘅可以去舞池，睇表演之餘，自己亦可以落場跳下A GOGO、牛仔舞，展示下身手。

睇懷舊片成日都見啲男女主角去拍拖，都會去郊外草地鋪塊布，用個騰籃裝著啲嘢食去野餐，我就真係未試過喇。呢度會有野餐籃提供，可以試下野餐係咩滋味。另外亦有其他餐飲供應，仲可以去VIP Tent做下上流社會，喺專用空間歎香檳美食。

本來呢個嘉年華係今個月搞，不過遇上佔領事件，就延期去11月15同16號。之前買咗飛嘅就自動順延，未買飛嘅可以上網預先買定飛，票價成人$280起，小童$100起、VIP $3,000起  (另收$10手續費)。信用卡佢收Visa、MasterCard、American Express，用中銀i-card網上簽賬有10X積分，可以買普通飛。買貴飛可以食匯豐最紅簽賬獎賞，累積滿指定金額有額外「獎賞錢」，最多賺$1,000「獎賞錢」。