旺中掃街攻略 新美食舊名物一網打盡

 

提到旺角中心的話，相信好多80,90後係讀書年代都留低唔少腳毛(包括我自已haha)。但近年旺中開始引入咗唔少嘅小食店，方便大家一邊行街一邊醫下肚仔，除咗唔同樓層嘅小食店之外，今年2017旺中係一樓新開咗一個飲食小區域多咗好多唔同種類嘅小食，今次就等我同大家試下新同舊嘅小食店啦！

 

12吋巨型窩夫 -  Nun Asia

地址：旺角彌敦道688號旺角中心1樓F84號舖

食物：芝士塔塔醬炸雞窩夫 $52

個人評分 :  ★★★★☆  (5星滿分)

 

▲Nun Asia有好多唔同口味嘅窩夫同韓式小食，佢地最特別就係紫薯窩夫同榴槤窩夫，但今次我就揀咗炸雞窩夫！依份芝士塔塔醬炸雞窩夫嘅辣醬唔會好勁，唔點食辣嘅朋友都應該問題不太，而佢嘅炸雞都好嫩滑，另外仲加咗芝士同沙律醬味道中和唔好會滯！如果大家覺得佢12吋份量太大都可以揀佢嘅6吋size呀！12吋對於我一個女仔嚟講真係足夠飽肚㗎！

 

特式饅頭漢堡 -  The Beef & Leaf

地址：旺角彌敦道688號旺角中心一期1樓F87A號舖

食物：牛葉流心半熟蛋饅頭 $46

個人評分 :  ★★★★☆  (5星滿分)

 

▲漢堡包大家就食得多啦！但如果係用饅頭做嘅漢堡大家又食過未呢？可以咁樣配搭大家會覺得好怪，但原來唔怪仲好好味添！因為饅頭口感比較軟又加上淡淡嘅甜味，所以同漢堡出奇地襯㗎！而我今次揀嘅流心半熟蛋，佢係牛肉中間加一個半熟蛋食落好Juicy㗎，加上佢嘅牛肉好入味又有肉汁，食一個包都唔會覺好滯！好味呀！

 

 

旺中十二年老店 -  Ice Queen

地址：旺角彌敦道688號旺角中心3樓TS14舖

食物：三球自選雪糕 $10

個人評分 :  ★★★☆ ☆  (5星滿分)

▲由我初中時代已經食過依間雪糕店，仲記得佢嘅價錢同份量都一樣無改變過，依家好少可以搵到10蚊有三球嘅雪糕店啦，今次我揀咗蜜瓜味(綠色)，提子冧酒味(白色)，朱古力曲奇脆脆味(咖啡色)。蜜瓜味唔會好甜仲有好香嘅蜜瓜奶味好清甜㗎，提子冧酒味就比較淡但一樣會有淡淡嘅酒香味，另外仲有好多原粒嘅提子乾非常有口感，最正嘅係朱古力曲奇脆脆啦，朱古力味好濃而雪糕入面嘅脆脆真係好脆口，真係好抵食呀！

 

▲其實一樓仲有好多全新嘅小食店㗎，下有機會再同大家試食同報告一下比大家知啦！