日本雞蛋祭！必試限定蛋料理

對蛋有要求嘅，都會鍾意食日本蛋；而食開日本蛋嘅，都會聽過「TAMAGO Japan Egg」。「TAMAGO Japan Egg」（日本畜產物輸出促進協議會雞蛋輸出部）其實係優良雞蛋嘅代表，有佢標記嘅日本蛋，都保證新鮮高品質，而且特別好食。

而由11月14日至11月30日期間，TAMAGO Japan Egg將會喺香港舉辦「日本雞蛋祭」，香港其中7間日式餐廳（niji bistro、rosie's cafe by café company、Tiger Curry、UFUFU CAFE、Wired Cafe、Wired Green、宗田屋）都會參與，並以日本新鮮雞蛋製作多款蛋料理，平時食飯非蛋不可嘅你又有咩理由唔去試先？所以同樣身為egg lover嘅小編就揀咗UFUFU Cafe同埋Wired Cafe試食，方便大家衡量應該去邊間食蛋蛋~

首先係UFUFU Cafe，講到蛋料理又點可以無蛋包飯？個人覺得呢個【咖哩蛋包飯】無10分都有9分~首先隻蛋唔係包住啲飯的，咁樣望落會更有層次感、賣相更吸引，可以即刻比相機食咗先。而隻蛋一放入口已經食到好香濃嘅蛋味，而且濕潤嫩滑，唔會犯下乾身嘅大錯。配合濃郁嘅日本咖哩醬汁同埋以新潟米製成嘅米粒，加埋日本直送嘅蕃茄醬、洋蔥、煙肉以及草菇等配料，都極有喺日本食嘅原汁原味蛋包飯味！另外，隻蛋之所以咁香濃幼滑，全因大廚以日本清牛油代替咗傳統橄欖油炮製日本蛋，誠意滿分。

而【招牌滑蛋沙律】嘅過人之處，在於大廚將超豐滿嘅炒滑蛋鋪滿沙律，並唔係就咁放隻溫泉蛋就算，再灑上厚切煙肉，增加咬口，配蛋包飯食一流。

來到Wired Cafe，我點咗【牛油楓糖漿西多士】同【雜果班戟】，本身唔係太鍾意食西多士嘅我，都食到停唔到口，可能係因為蛋漿特別好味，麵包又夠軟夠入味。原來大廚自製蛋漿嘅做法係，先將蛋漿混合糖同牛奶雪一日，第二日先塗上西多士並煎香，令麵包浸透蛋香，先可以同時食到蛋香同麵包香。

隔離嘅法國原裝楓糖漿，比一般較「潔」較苦嘅楓糖漿更甜，令成個西多士漏上加漏，不過反正都食甜，不如豁出去吧！

都係想食得保守啲的話（唉女人），可以選擇【雜果班戟】，因為忌廉係無．脂．肪架！加上種類繁多嘅水果例如藍莓、火龍果、西瓜、橙、士多啤梨、蜜瓜等，健康又可以帶來飽腹感，仲暖笠笠添！不過留意番，加咗牛油同埋自家製蛋漿嘅餅底其實都好好味，減肥？都要食飽先有力減嘅~

另外，凡於推廣期間到餐廳點指定蛋料理食就有日本雞蛋磁石送，幫襯其中兩間餐廳嘅蛋料理的話，仲可以去官方Facebook玩遊戲贏取玉子燒鍋添！

UFUFU CAFE
地址：尖沙咀金馬倫道5號太興廣場5樓 
電話：2711 6117
營業時間：星期一至四及日：中午12時正至晚上11時30分 ／ 星期五、六：中午12時正至晚上12時正

Wired Cafe（尖沙咀分店）
地址：尖沙咀彌敦道118號Mira Mall地庫B13號舖 
電話：2369 6679
營業時間：星期日至四：中午11時30分至晚上10時30分／ 星期五六及公眾假期：中午11時30分至晚上11時正