【日本海外首間分店 • 卡樂B Calbee+ 】- Stella Yeung

【日本海外首間分店 • 卡樂B Calbee+ 】- Stella Yeung

相關信用卡:

【日本海外首間分店 • 卡樂B Calbee+ 】- Stella Yeung

發表日期: 2016 年 03 月 22 日 更新日期: 2016 年 03 月 22 日 飲食

作者:Stella Yeung


哈佬哈~ 又係我Stella Yeung ~
今次同大家嚟到灣仔嘅Okashi Galleria x Calbee Plus概念零食店 , 香港係卡樂B喺日本海外嘅第一間Calbee Plus分店
繼之前半熟芝士撻日本新鮮熱買小食又多一間選擇啦 , 唔洗專登飛去日本都可以食到 , 正!!!

香港概念零食店一共有兩層 , 第一層係體驗店 , 有好多唔同零食精品賣 , 第二層係零食工作坊 , 但第二層未正式開始 , 我問咗工作人員 , 佢地話工作坊開放時間暫時待定 , 想知有咩工作坊玩依幾個星期就密切留意啦 , 其實我都好好奇有咩玩啊 HAHA


門口好靚啊 , 但最衰當日落雨 , 如果唔係我會不停影相影相同影相 !!



一入到去就見到特設透明玻璃開放式廚房,可以近距離就可以睇住佢地整新鮮薯片同薯條嘅製作過程


新鮮金黃色薯片真係好吸引~

Calbee Plus每間分店都有各地唔同嘅特色而推出地方限定口味 , 而海外第一店就獨家推出咗香港限定「避風塘香辣味薯片」, 避風塘菜式好多香港人都好鍾意,唔知將避風塘風味結合薯片到底會係點呢?
另外,香港分店都會有兩款卡樂B薯條熱食,包括日本人氣No.1嘅Poterico原味薯條同芝士味薯條,去咗咁多次日本都未試過新鮮薯片同薯條 , 所以我今次會一次過試晒佢 HAHA


全部薯片都有平切同波浪切嘅
鍾意有口感或者鍾意脆都一樣符合到口味
避風塘香辣味薯片比熱浪再辣啲
再濃味啲 , 如果你鐘意食辣的話我覺得依個好適合你哋


一般包裝薯片都覺得波浪切好食啲因為特別香脆
但新鮮薯片我個人比較鍾意平切 , 因為即炸關係平切脆度比波浪切多
個薯仔味仲特別重添 !!!


熱食薯條都有分兩種味道
第一種味係原味 , 佢唔係只係薯仔味仲夾住少少雜菜 , 幾清甜
第二種味係芝士 , 芝士就比較香濃 , 薯片同芝士個味真係超級無敵咁夾


依個薯條真係好好食啊
佢熱辣辣入面係軟軟稔稔嘅薯仔 , 出面係好脆 ,好香薯仔味


真係好好食 , 完全停唔到口 HAHA


除咗普通零食之外 , 最入面個位置 , 好多日本限定嘅零食
仲有限量版官方主題精品 , 重要係香港概念店獨家推出~


真係有好多種喺香港搵唔到嘅零食
依個係檸檬味 , 你想想唔想像到檸檬味嘅薯片到底會係點 ?! ~


櫻花季節當然一定要出期間限定啦~
依個櫻花鹽味蝦片點會係香港獨家優先發售
話你地知仲要係大包 $8真係真心抵 塊蝦片仲要係櫻花圖案
真係靚到唔捨得食啊 ~


除咗零食仲有好多紀念品買㗎 ~


依個杯好得意啊
旁邊個架車係限量500架宅卡B珍藏版迷你巴士模型 香港限定


除咗啱啱試咗四款之外 , 我仲試咗幾款唔同嘅小食
佢仲有超過十款唔同嘅配搭例如有 朱古力 芝士 雪糕等等唔同嘅味道

限定薯片免費大放送
如果你地都想試食呢 香港卡樂B專門店喺3月22至28日每日下午一1點同6點
每時段送出50杯薯片 , 先到先得 , 唔好話我唔通知你哋啊 HAHA

Okashi Galleria x Calbee Plus
地址:香港灣仔皇后大道東200號利東街地下G14-15號 (合和中心對面)
營業時間:(星期一至日) 10:00am – 10:00pm
付款方法 : 現金 / 八達通 / Visa / MasterCard / 銀聯