日本人氣「溫野菜」試食 kabu pass入得過

如果成日去日本，又鐘意打邊爐烚下烚下，應該對「溫野菜」呢個名唔會陌生，事關佢唔單止喺日本有超過350間，喺台灣都一樣有分店。上年12月溫野菜就係香港尖沙咀LCX開張，今年4月仲喺銅鑼灣開咗第二間添，今次小弟就去咗尖沙咀個間食咗個Lunch。

叫得做溫野菜，當然主打蔬菜啦，種類比一般火鍋店多，Menu就寫佢啲菜係由日本直送(當然我估唔係隻隻菜都係啦)。至於肉類就有和牛、熊本豚肉同雞肉等選擇。

如果有喺台灣食過，就知道佢地有「吃到飽」(即係任食)揀，但香港同日本就唔行任食，都係逐份逐份嗌，而且係一人一鍋，湯底就有9種，由$19-$39不等，我同朋友就揀咗壽喜燒同骨膠原柚子塩湯。

肉類我地就叫咗上級牛肋肉，熊本豚腩肉同梅肉；蔬菜就嗌咗野菜盛合、金時蕃薯、青皮南瓜、青蘿蔔；另外仲嗌咗八爪魚餅、寬條麵同蕎麥麵，飲品就叫咗梅子青檸梳打。

每張檯都會有柚子汁同麻醬供應，開始食之前侍應會同你柚子汁係for蔬果，麻醬就落肉類。蔬菜入面，自己就比較鍾意生菜同青蘿蔔，其實你話佢日本送嚟我就唔係好食得出，不過佢同個柚子汁真係幾夾，落完即刻覺得好味咗。

至於肉類，就真係一分錢一分貨，上級牛肋肉比兩款豚肉較好味，壽喜燒湯會送隻日本雞蛋，蛋味勁濃，用黎配肉真係超正，就算配麵都好夾，至於熊本豚梅肉就咸咗少少。

加加埋埋，埋單都要400蚊，lunch嚟講會比較貴少少。不過佢有個會員制度，叫做kabu pass，雖然入會要$200，自己研究過其實都join得過，分別有幾個優點：

多間日式餐廳適用
Kabu pass唔單止喺「溫野菜」用到，同集團嘅「牛角」、「牛涮鍋」同「寿司大」都可以用，唔計入會送嘅coupon，堂食都有9折，而且12個月只要消費夠$3,000就可以免費續會。

電子coupon
入會時會送一堆coupon，比較抵嘅已經有堂食$100同$50 coupon，仲有「牛涮鍋」90分鐘放題四人同行三人價錢優惠券，加埋唔同免費食物coupon等等，基本上入會後食兩餐都已經回到本。

積分獎賞
會員食嘢可以儲分($1=1分)，分數可以換嘢食，例如1,000分可以去牛涮鍋換到Asashi啤酒放題，1,100分可以係溫野菜換到碟熊本豚肉眼，如果同朋友食兩餐應該都已經有嘢換到。網上啟動帳戶仲即送200分，生日分數仲會double計。

總括嚟講，溫野菜味道唔錯，比起同集團嘅牛涮鍋好味得多，當然價錢都貴返啲，如果成日會去溫野菜、牛角等嘅日式餐廳，kabu pass絕對申請得過，有得用coupon再儲分換嘢食，加埋用信用卡俾錢嘅話，例如匯豐嘅「最紅自主獎賞」，加倍所落飲食類別，又可以再賺多啲。