日夜鍛鍊曬到黑?齊睇開架美白產品
日夜鍛鍊曬到黑?齊睇開架美白產品
相關信用卡:

日夜鍛鍊曬到黑?齊睇開架美白產品

發表日期: 2016 年 08 月 01 日 更新日期: 2016 年 08 月 01 日 生活
作者:Yvone 二方

大家呢幾日有冇日夜去鍛練呢?呢個遊戲有人鍾意有人唔鍾意,不過我覺得玩得小心啲,令人行得多咗都係好事吖!為咗捉小精靈,到底你行多咗幾多路呢?我就有聽過冒住炎熱同太陽出去捉小精靈,搞到個人黑咗。黑咗咁點算好?咁就要留意吓呢篇文,會講吓開架品牌嘅美白產品㗎!

皮膚點解會變黑?
皮膚變黑係因為黑色素(melanin)積聚。當我哋嘅皮膚受到陽光或者紫外線照射嘅時候,身體嘅黑素細胞(melanocyte)會產生黑色素(melanin)。當皮膚受到UVA照射時,黑色素會氧化,會變得深色同埋重新分佈過,令皮膚顏色加深,但總體黑色素嘅數量並冇增加。而當皮膚受到UVB照射時,黑色素嘅產生會增加,不過皮膚變深呢個效果要2-3日先會睇得到,呢個膚色都可以維持幾個星期至幾個月不等。

美白產品入面嘅成份,就係減低黑色素嘅數目,從而達到美白嘅效果。佢哋會喺色素形成嘅唔同階段做嘢,令黑色素減少,咁皮膚就會冇咁黑了。

我哋就睇吓喺護膚品入面常見嘅美白成份:

熊果素(Arbutin)
熊果素係一種由熊果葉萃取嘅成份,可以透過抑制tyrosinase去阻止黑色素形成,依家好多美白產品都搵到佢嘅踪影。

維他命C (Vitamin C)
維他命C係一個抗氧化劑,可以中和自由基(free radicals)嘅傷害,預防肌膚變老。同時,維他命C都可以用來處理色素,佢可以阻礙色素嘅形成,佢都係透過抑制tyrosinase去做到呢個效果。長時間外用維他命C大致安全,亦可以同其他外用產品如防曬、抗氧化物品使用。

麴酸(Kojic Acid)
麴酸係一種喺製造清酒及日本米酒時,大米喺發酵過程中所產生嘅副產品。當用喺化妝護膚品時,佢有美白嘅效果。

果酸(AHA)
果酸係指喺水果入面提取嘅酸,種類有好多。果酸可以去除皮膚老化角質,加速皮膚表層嘅更新,令帶有色素嘅表層被換走,從而達到美白嘅效果。AHA嘅代表有glycolic acid以及lactic acid。亦有研究指出glycolic acid以及lactic acid可能可以抑制tyrosinase阻礙色素嘅形成,不過需要更多嘅研究資料去證明。

依家睇吓開架嘅品牌有咩選擇啦!

樂敦 MELANO CC呢個系列最近都好容易喺個人護理用品店度搵到,放咗喺日本藥妝嗰度。


樂敦 MELANO CC美白化妝水

 


▲呢支化妝水有維他命C同埋甘草次酸做有效成份,亦配合保濕成份。維他命C能夠阻礙色素形成。打開聞一下係滿滿嘅檸檬、橙嘅香味,幾舒服醒神。萬寜售價:$87
 

樂敦 MELANO CC面膜

 


▲同系列仲有面膜,依然係用維他命C做主打,而且加入維他命E。佢嘅香味同化妝水嘅一樣,幾舒服。不過面膜個質地好薄,好似大力啲都會撕爛咁,拎上手時覺得精華唔算多,但敷上面都覺得足夠。好處係佢眼睛嘅範圍都可以覆蓋到,如果合埋眼,全面就可以敷晒冇漏網之魚。萬寜售價:$87
 

高純度熊果苷嫩白蘋果肌面膜


 


▲此款面膜含有熊果素(Arbutin)作為美白成份,另外有杏仁酸幫助換膚,加速代謝老舊角質,令肌膚變得明亮。萬寜售價:$65


我的美麗日記淨白面膜

 


▲講到面膜又點少得我的美麗日記,以開架品牌來講,佢嘅品質、口碑都係唔錯!呢個面膜係以熊果素做主打,同時加入其他植物提取物小黃瓜、甘草、檸檬等進一步加強美白保濕嘅功效。萬寧售價:$60


肌研白潤冰感保濕精華露 



▲講起肌研,成日都諗起佢係保濕嘅品牌,原來佢都出咗一個「白潤」系列,睇個名就知道係有美白嘅功用。以呢隻冰感保濕精華露為例,佢有加入維他命C做美白效果,同時加入透明質酸做保濕。我自己就會選擇喺夏天先會用佢喇!因為佢嘅冰感係加入咗薄荷醇,夏天用涼浸浸應該幾舒服,不過冬天我就怕太凍了。Sasa售價:$135
 


*一切價格以零售點為準


美白小貼士:
美白產品並唔係仙丹,唔係單單搽咗佢聽日就會變白,想要皮膚keep住白淨,需要多方面嘅配合㗎!
首先每日外出前記得要塗抹防曬,喺流汗或啫抹擦之後要補搽。想知多啲防曬嘅知識或者睇番防曬產品,可以睇番我之前嘅blog。如果用咗果酸產品,就更加記得要搽防曬呀!因為果酸可能會增加皮膚對陽光嘅敏感度,皮膚被曬傷嘅機會會增加。

唔知有冇見過有人直接將一片片檸檬敷上面呢?上文講到維他命C有美白嘅功用,敷檸檬正好?雖然檸檬有豐富嘅維他命C,不過檸檬皮入面有furocoumarin嘅成份,佢係一隻感光嘅成份,做唔到美白之餘,接觸到陽光仲會曬黑,得不償失㗎!而且檸檬本身都好酸,將佢敷上面部皮膚,可能會對皮膚做成刺激,到時敏感仲衰啦!

用新產品之前,最好先用一個小範圍嘅皮膚去測試,冇問題先大範圍用上塊面啊!

由即日起至2016年8月31日,於萬寧累積合資格簽賬滿港幣1,000元,可享高達額外12%「獎賞錢」回贈。而以Apple Pay或其他感應式付款功能作單一交易滿港幣500元,更可即獲港幣10元現金優惠券於下次購物時使用。
此外,透過Apple Pay 作3次滿港幣30元的交易,可享額外$10「獎賞錢」。

信用卡優惠詳情可以去番<呢度>睇。

參考資料:
http://www.ncbi.nlm.nih.gov/pmc/articles/PMC3673383/
http://www.ncbi.nlm.nih.gov/pmc/articles/PMC3047947/
http://www.fda.gov/Cosmetics/ProductsIngredients/Ingredients/ucm107940.htm