日圓跌破7算 旅行購物簽卡再賺

最近日圓跌到跌破7算，1日圓兌0.069港元，真係近年新低，相信最近將會出發去日本玩嘅朋友就最開心啦，可以買多啲戰利品。而家Plan緊或開始Book機票酒店準備遲啲遊日，亦可以慳返啲旅費。另外，上網網購亦可以受惠。既然而家日圓低水，係時候去玩去買去食啦。

海外簽賬倍賺積分里數
去到日本掃貨，簽卡梗係要用啲海外外幣簽賬有額外獎賞，或者日本簽賬特別著數嘅卡啦：

富邦白金卡 / Titanium卡：日本8X積分($1=8分，要喺簽賬月份登記)
AEON卡：日本5X積分
建行 (亞洲)白金卡 / Titanium卡：「賞即飛天地」海外外幣簽賬3X積分
美國運通國泰航空尊尚信用卡：海外外幣簽賬$4=1里數
DBS Black卡：海外外幣簽賬$4=1里數
渣打WorldMiles卡：$5=1里數 (15積分)
Citibank PremierMiles卡：海外外幣簽賬$4 = 1里數 (12積分) 或2%回贈
東亞World / Flyer World MasterCard：海外外幣簽賬2X積分 ($4=1里數)
匯豐信用卡：「賞世界」最多6X「獎賞錢」，加埋「最紅星期五」有11X
恒生信用卡：海外簽賬3X Cash Dollars
DBS Eminent Card / 白金卡：海外外幣簽賬3%現金回贈

留意外幣交易手續費及匯率
除咗額外獎賞之外，亦要留意每間銀行都會收外幣交易手續費 (詳情可以睇下積克呢篇Blog)，當中比較平嘅有AEON、大眾銀行 (1%)、永隆、信銀國際、創興 (1.75%)，而其他大部分Visa / MasterCard都係1.95%，American Express 2%。至於銀聯卡可以免手續費 (匯豐同恒生除外)，但收銀聯卡嘅舖頭會少啲。同時唔同信用卡平台嘅匯率都有唔同，以今日(11月3號)每1日圓計，Visa兌$0.071031、銀聯兌$0.0692、MasterCard兌$0.069837 (最近兌換日期只可揀10月31日)、American Express兌$0.06902。大家可以根據自己有嘅卡，計埋手續費，睇下邊張賺得多，匯率又比較好。撇除手續費同匯率，如果要賺分多，我會揀富邦白金卡 / Titanium卡。

JCB著數多
喺香港，相信比較少人有JCB卡，因為香港收JCB嘅地方唔多，而香港只得AEON同東亞有出JCB卡。不過去到JCB嘅主場--日本，就唔同講法，除咗5X積分 (詳情)，拎住JCB卡去東京鐵塔，可以免費上大瞭望台 (詳情)，慳返￥900。同時JCB白金卡預訂日本食肆，有二人同行一人免費優惠。如果喺日本簽夠￥30,000，返到嚟香港可以去JCB PLAZA Lounge填份問卷，就可以換$200超市禮券 (詳情)，有JCB卡記得要帶埋去日本喇。

訂機票酒店用日圓結賬
去日本玩自然要訂機票酒店，有時廉航會出特價機票，只有去程，而家就啱晒，回程機票票價，連帶機場稅同附加費都用日圓，隨時平過港幣。除咗去日本，買去其他地方機票都可以用日圓格下價。至於訂酒店亦一樣，都可以格下港幣價同日圓價。當然，唔好唔記得計埋信用卡外幣手續費同匯率。

里數換機票可停留
如果用Asia Miles里數換日本機票，需要30,000里數，不過可以有2次停留(Stopover)、2次轉機同埋一次終斷(Open-jaw)，可以玩多兩個地方。例如冬天想去北海道，可以香港飛東京羽田機場轉機去札幌，玩完北海道去旭川搭返東京Stay多一陣先再返香港。當然，前提係要個路線成立，同埋有機位啦，要訂飛或者有咩唔明都係打去Hotline，佢哋會話你知個路線換唔換到同幫你搞。

出發前去銀行兌日圓
去日本除咗簽卡，梗係要唱定Cash，出發前可以去銀行唱定先。去銀行唱要有嗰間銀行嘅戶口，就可以直接去用現金唱。如果有外幣戶口，就可以用網上銀行由港幣戶口轉過去外幣戶口，第二日去銀行攞錢。不過用現金唱係睇現金賣出價，網上銀行過戶係睇電匯賣出價，通常電匯價會好啲，唱之前可以去唔同銀行網站格咗匯率先。想要兌得抵，記住唔好去到機場先唱，會貴啲咖。另外，出發前記得去Set定提款卡海外提款限額限額，以備不時之需。

日本網購照賺
除咗去旅行慳到旅費，日本網購一樣係變相減價。有啲卡有網上購物額外獎賞，例如：

建行 (亞洲) eye卡：網上簽賬5X積分
東亞i-Titanium卡：網上購物3% i-Dollar回贈
中銀i-card：網上零售交易10X積分
Citi Clear Card：網上外幣簽賬2%現金回贈

不過有啲日本網只送日本本土，就要搵代運或代購。DBS同Buyee同Tenso做緊優惠，買嘢有10%現金回贈，喺三階段優惠期內，每個階段最多回$200。而喺樂天市場買滿$500或以上，每階段一樣回10%，不過每階段最高回$300。