日圓又爆升! 早兌早享受, 遲兌多幾舊!?

<高sir隨筆>:日圓可以話係最多人關心的貨幣之一, 冇炒開外匯的朋友, 又或冇睇開股票的姐妹, 對住日圓都不會陌生, 香港人骨子裡崇日的心態, 其實同台灣人不相伯仲. 早幾年, 日圓匯價接近10算天價, 兌港幣1:1, 食碗面都要八十蚊港紙的時間, 港人遊日之心有幾多個受到動搖? 牙痛咁既聲一樣帶住矛盾去旅行罷!?

｢日圓會幾時跌｣, ｢跌唔跌得番去六算｣, 由年頭筆者比人問左十萬九千幾次了! 問題係, 如果要兌錢去旅行, 咁我認為其實真係冇必要咁緊張, 日圓匯價早前稍微回吐番見6.8, 就可以諗下兌定部分等出發罷!? 卻唔少人問: ｢高sir, 我暑假先去日本旅行, 我怕到時日圓回番去6.4, 咁點好呀!?｣

喂, 大佬呀, 我想講如果你地打算暑假去日本, 團費都已經比平時貴成倍, 你都唔介意啦!? 下嘛! 無理由為左個匯價係6.8定6.4, 就係果0.4匯率上落咁鬼苦惱嫁!? 下嘛! 假設你去日本個budget用$68000港紙去兌yen, 咁$68000 同 $64000的分別, 的確係慳左$4000, 本來可以慳番黎去買下野都好既, 但報得暑假團都唔介意比多幾千蚊去玩囉, 有咩理由又介意匯價果幾千呢!? 何況, 你係咪打算兌咁多去日本盡情吃喝玩樂先? 如果你答: ｢嗯!｣, 咁豪你又度咩果三四千呢? 唉!

週三, 日本首相安倍晉三把提高消費稅的計劃, 押後多兩年半, 調高消費稅是｢安倍經濟學｣中的其中一部分, 為的是刺激其本土內需經濟增長, 安倍呢個時候出一招, 立即令日圓的強勢重現, 日圓兌美元立即回見1.09水平, 兌港元立即回見｢7算｣了.

老問題, 日圓究竟幾時出手好, 筆者給大家一個答案, 去旅行幾日至十幾日的朋友, 其實匯率多0.4同0.4分別真係唔大, 無必要為左個旅行, 太執著最低位去兌錢, 就開開心心準備好行程仲好啦! 但如果你話投資外匯, 做外匯掛勾的票據定期, 又或買日本樓去投資的朋友, 你就真的要分分鐘留意匯價的風吹草動, 幾時出手的確要諗清楚才出擊! 日圓七算的強勢能否持續!? 好大程度上看日本經濟能否續從谷底爬出來, 面對中國在出口, 基建等的威脅, 日本經濟要從谷底中回復昔日大國強勢, 談何容易!? 日圓強勢令其本土消費和經濟增長, 帶來無比沉重的打擊, 這不是安倍想見到的情景, 能夠保持七算以上的光景, 又或爆上早前的｢八算｣/｢九算｣的機會應該不大, 如果真係有咁既一日重臨, 相信就是環球股市｢股災｣之時了.