旅行碌卡要小心 原幣外幣陷阱要留神

上次「ATM陷阱」果篇(詳見呢度呢度)，我個好姊妹話好似係幾實用，不過佢都係寧可碌卡免得又要搵地方撳又要做咁多事前準備……一句講哂，呢啲咪係懶女人囉！咪以為去外地冇哂現金，拎張卡出嚟「耀武揚威」就冇嘢先得架！

Lady C.花咗啲時間爬文，發現有唔少師兄師姐都中過DCC(或者叫CPC都得)陷阱(例如呢度 or 呢度)。不過要講點樣小心避免DCC陷阱之前，等我班門弄斧試吓解釋咩係DCC先：

DCC即係Dynamic currency conversion(CPC係Cardholder Preferred Currency)，譯出嚟叫動態貨幣轉換或者即時同步換匯服務，簡單嚟講就係當你喺海外碌卡，可以選擇用發卡地點嘅幣值，例如港幣，而非當地幣值結賬。

例子一、直接轉冇選項

例子二、有選項

例子二、有選項

聽落可以用港幣簽，對數方便之餘又可以免受匯率差價？事實並非係咁，反而會計匯率兼會收手續費，實付額隨時高過用簽卡當地幣值結帳！要避免被DCCed，要留意以下幾點(希望有其他師兄師姐一齊補充)：

• 出發旅遊前打個電話問吓發卡銀行海外碌卡手續費係幾多%，睇睇有冇變動
• 聽各討論區講都係Visa同MasterCard會遇到DCC嘅機會較高，AE同銀聯較少(銀聯雙幣卡又引伸到其他問題，好複雜)
• 碌卡前記得同商戶講清楚想用咩幣簽賬
• 落筆簽前望實張單有冇選項可以剔，如果分唔清楚剔定交叉邊樣啱，記得同商戶核實(聽講唔少機卡主唔選用咩幣，就會用預設 = 發卡地點幣值)
• 核實唔到就要求「取消交易 VOID」，記得唔係「退貨 REFUND」(尤其係北上神洲更要小心)！
• 如果簽果張單係過底單就記得留底對數；如果唔係，花少少時間影一影總冇壞處
• 萬一唔好彩，真係於不願意或冇經同意嘅情況下被DCCed，應該先同銀行同簽賬商戶傾(有師兄師姐提過銀行有機會提供其他賠款措施應對，接唔接受真係要聽真啲問多啲)