旅行撳機要小心 ATM陷阱要留神

Lady C.我琴晚約咗個好姊妹食飯，一坐低佢就連珠發炮猛講啱啱去清邁旅行嘅怪&趣事。對於佢用Hotels.com訂房但去到當地無啦啦獲得兩次Free Upgrade住到Deluxe Room，Lady C.我表示各種羨慕嫉妒恨！不過佢都有失算嘅地方，就係帶唔夠錢去掃辣醬、椰子油、冬蔭功杯麵……(下刪數百甚至數千樣FF戰利品)，我忍唔住即刻問佢點解唔一早設定海外提款，估唔到佢竟然答我「驚中伏」。

係嘅，好似討論區(詳見呢度呢度)都有師兄師姐話中過招，尤其係選擇將儲蓄戶口連結埋信用卡嘅各位就更加要小心！因為分分鐘海外部ATM唔俾選擇由邊個戶口扣數，就直接喺信用卡扣賬！咁提款手續費同信用卡透支當然係兩樣嘢！好似用銀聯卡喺日本撳錢，每次手續費都係$15-$20左右，但換著係利息加手續費……就隨時超過$100！

於是Lady C.我膽粗粗列咗個注意清單，希望幫到自己又幫到大家(另求大家一齊幫忙補充)！

• 肯定自己張提款卡/信用卡有有銀聯/PLUS/Cirrus標誌
• 一般轉咗晶片卡都係得返銀聯功能，唔再適用於PLUS/Cirrus系統
• 上網/自動櫃員機/分行 設定開啟海外提款功能及限額
• 如果一早設定成開啟，都要記得確認仲生效緊
• 如果係用連結儲蓄戶口嘅信用卡提款，切記要留意有冇得選擇從邊個戶口撳
• 覺得自己需要用幾多外幣就一鋪撳，分開幾廿次撳會收多幾廿次手續費
• 真係唔好彩從信用卡戶口結欠，返嚟香港記得快啲還數，再打去熱線睇下有冇得豁免(唔包生仔)
• 唔放心用信用卡提款，建議都係帶返一張只係用提款功能嘅卡遊外地