新芋圓店登陸！4大芋圓店比併

香港好多人都鍾意食芋圓，奈何芋圓好易變壞，就算台灣空運返嚟都好難保證鮮味不變。所以有唔少本地甜品店都摻一腳，於餐牌中加入芋圓甜品。呢股芋圓熱潮未燒完不特只，仲好似愈來愈熾熱！依排旺角開咗間新台式小食店，主打台灣直送芋圓。聽落好吸引，不如比較下呢間新貴同其他人氣芋圓甜品店，睇下邊間啱心水吖。

 

1.康瑞甜品 
搬新鋪後依然維持水準！

搬咗新鋪嘅人氣依然爆燈，主打自家製仙草、芋圓、地瓜圓，配料豐富，價格經濟，高CP值留得大批粉絲回頭幫襯。

招牌甜品「特色仙草百配」

環境：舊鋪地方細細，以往好多人選擇外賣或者開檯坐出馬路邊食甜品，場面墟冚。依家新鋪約有十幾張檯，環境比舊鋪舒服、闊落好多，門口玄關有一Outdoor檯，背後塊磁磚牆設計好有心思，相信係老闆有心打造嘅打卡位！
 

食後感：
芋圓、地瓜圓：一碗中有十幾粒芋圓及地瓜圓，＄25嚟講超值！口感Q軟煙韌，同台灣本地芋圓有得揮。食落口芋圓同地瓜圓有淡淡芋頭同蕃薯味，食得出係用原材料製造，並非人造香精味道，抵讚。

配料：有薏米、珍珠、小丸子、西米露、紅豆、芋圓、地瓜圓、仙草、淡奶。康瑞出名足料，除咗主角芋圓、地瓜圓，一羹潷上嚟就見到薏米、珍珠、小丸子、西米、紅豆、仙草咁多料，係幾間之中最多配料，好滿足！最欣賞係仙草，幾間芋圓店之中算最滑溜，滑嘟嘟不經咀嚼就流入喉嚨。另外重量紅豆令湯底好似紅豆沙一樣，配埋淡味嘅其他配料，令整個甜品味道好和諧。

價錢：＄25

地址：深水埗荔枝角道323號地舖
時間：星期一至日16:00-00:00
電話：9034 3832

2.台灣小食

幾過癮！大大粒包心餡芋圓
 

開業冇耐已經成為登打士街最矚目小食店。由賣台灣食品嘅新台場開設，小食有芋圓、大腸包小腸、鹽水雞、胡椒餅等。大部分食物都由台灣直送到港。除咗大熱芋圓，胡椒餅都係店中人氣招牌。

招牌甜品「 綜合芋圓」

環境：店面細細，光猛而乾淨企理。買完食物要立食，有少少似珍珠奶茶店，買飛後喺另一邊等食物出爐。不過店面人流算多，建議買完搵個地方慢慢嘆。

食後感：

芋圓、地瓜圓：有5粒，Size比一般芋圓大，由台灣製造直送到港。食物即叫即整，Menu話可能要等幾分鐘，當日製作時間都好快，唔使等太耐已經可開餐。芋圓同地瓜圓包咗餡，紫色同黃色係地瓜圓，包咗芋頭泥做餡；白色係芋圓，包咗蕃薯泥做餡。外皮Q軟度麻麻，味道欠奉，勝在餡料真材實料，一啖咬落可以試足芋頭同蕃薯味，口感豐富。

配料：有仙草或刨冰、芋圓、地瓜圓、紅豆、綠茶果凍、芋泥、沖繩黑糖漿。芋泥略嫌唔夠腍，冇咩調味，鍾意健康嘅朋友應該幾鍾意。綠茶果凍同仙草份量好慷慨，不過唔算滑，表現平平，重心可以去返主角芋圓身上。

 

價錢：＄28

地址: 旺角廣華街1號仁安大廈地下24A號鋪

電話: 2885 3080

時間: 星期一至四11:30-22:00pm
星期五至日11:00-22:30

 

3.海記合桃坊甜品

芋圓份量足！略嫌過甜

海記合桃坊甜品一向主打中式甜品，以沙沙合桃糊為店中招牌甜品，自從推出紫薯＋芋圓系列甜品之後，店鋪人龍不絕。

 

招牌甜品「紫薯芋圓西米露」

環境：傳統甜品店裝潢，店面幾闊落，坐得算舒服。

 

食後感：

芋圓、地瓜圓：芋圓份量幾足，呈圓形狀，比較細粒。芋圓幾煙韌，有濃濃芋頭味，相反地瓜圓嘅蕃薯味比較遜色。

配料：有紫薯球、芋圓、地瓜圓、西米、椰汁。椰汁頗多，令到西米露底過甜，食到一半覺得好膩。紫薯球令人覺得好似食緊一塊新鮮紫薯一樣，足料！

 

地址: 太子西洋菜南街232號

電話: 2399 7937

時間: 星期一至日13:00-01:00

 

4.來來小吃店

真材實料！台灣地道風味

太安樓名店，經常大排長龍。老闆係台灣人，店鋪係家庭式經營，大受歡迎嘅芋圓每日用新鮮芋頭同地瓜粉人手搓成，招牌有「台灣傳統黑糖刨冰」、「燒仙草」同「仙草冰」，亦有賣咸食，如魯肉飯。
 

招牌甜品「仙草冰」

 

環境：主打做外賣生意，畀錢後稍等就可以拎走甜品立食或拎走嘆。等候時間算快，店員態度親切。
 

 

食後感：
 

芋圓、地瓜圓：芋圓幾大粒，而且好煙韌，4間店裡面最Q彈軟熟！芋頭同蕃薯味幾重，仲食到粒粒蕃薯、芋頭肉，真材實料。不過略嫌份量少，唔太夠喉。
 

配料：有芋圓、地瓜圓、芋頭、粉圓、仙草。呢度嘅芋頭有用糖煮過，煮得夠熟，口感粉粉地非常好味。仙草幾嫩滑，而且係完整成舊入碗，食客可以自己慢慢潷做細細舊入口。

價錢：＄30
 

地址：西灣河筲箕灣道57-87號太安樓第二街A33B號鋪

時間：星期一至五12:00-01:00