新盤癲價 明星為乜爭入巿？

兩大新盤：南昌站匯璽，同將軍澳Monterey，日前開售，反應熱烈，共789伙兩日內沽清，均加價半成至逾1成出售。有專家認為，中資頻頻高價投地，準買家估計未來樓巿有升冇跌，所以紛紛「趁低價」入巿。

嚟入巿呢兩個盤的，又點止出得起首期、但要供樓供成世的中產巿民呢？仲有明星藝人添，佢哋買樓的原因會係乜？

 

周秀娜：有興趣物業投資

 

周秀娜就喺Monterey開賣首日，一個人戴住白色Cap帽嚟揀樓，有指佢用$800幾萬入手一個兩房單位，另有消息指單位係$620萬，實用面積不足400呎。

娜姐買樓的原因係咩呢？佢透過經理人回覆傳媒指，「一直都有興趣物業投資，有新盤所以就看看是否啱心水。」講到明有興趣投資，睇嚟佢相信樓價仲有得升。

 

 

惠英紅：有需要同買得起

 

同樣現身Monterey售樓處的仲有影后惠英紅，雖然佢講話啱心水的3房單位「被人揀晒」，事實上其中一個就係佢屋企人，買咗886呎的3房單位，售價$1,400萬，「有需要同買得起咪買」，而佢現身售樓處只係向買樓的家人「畀吓意見」。

佢又話香港經濟會好，睇嚟都係覺得樓價仲有得升。

 

 

 

 

DaDa：抽到大單位唔會買

 

明星唔係獨愛Monterey的，因電影《此情此刻》，喺三藩巿電影節角逐獎項的陳靜（DaDa），就承認入咗紙想買南昌站匯璽單位。被問會唔會入手$3,000萬大單位，佢就話「就算抽到都唔會買」，反而預咗$800萬左右買兩房單位。

因為匯璽呎價貴，約$2.3萬起跳，DaDa預$800萬，相信有意入手約350呎單位。

 

 

麥明詩： 等樓價跌好耐

 

麥明詩成為港姐之後，演出經驗唔係太多，相信未儲夠錢買樓，但佢爸爸係中學副校長、媽咪係資深職業治療師、哥哥係醫生，個個都係專業人士，雖然依家樓價唔平，應該有能力入巿掛。

喺匯璽開售當日，麥明詩媽媽同哥哥都有出現，有報道指佢哋對細單位冇興趣，主攻四房雙套大單位，面積1,300至1,500呎，最平都要近$3,000萬。

不過麥明詩就澄清話，雖然家人對東涌沿綫樓盤有興趣，但「邊有咁多錢」，仲話「等樓價跌等咗好耐」，家人冇打算換樓，只係睇吓咁話。

 

▼麥明詩一家一門多傑，個個都係專業資格，以佢哋收入，買匯璽唔難吖