![接駁南港島綫遊香港三大離島](https://www.hongkongcard.com/blogs/wp-content/uploads/2016/12/blog/thumbnail/1841_58676280f0b23-768x432.jpg)
各位好!! 又係週末好Hea處時間啦! 上個星期講完幾部科幻電影(其實『長城』都算科幻…),希望能夠作為大家選擇時嘅參考啦。好! 講完室內活動之後,今個禮拜又係時侯走返出室外接觸吓大自然囉喎。
最近南港島線(東段)通車,對於小編呢啲堅毅嘅物種(屯門人)真係好消息! 以前想去離島玩下,其實又真係幾頭痕,特別係「香港南極」蒲台島,上船位唔係香港仔就係赤柱,即係變相叫小編唔好去啫。不過而家通車之後,下面嗰堆地方又真係方便咗喎。真係要去睇下啦。
蒲台島
作為香港最南嘅島嶼,蒲台島可以睇嘅實在太多,除咗126燈塔睇日出同睇星之外,島上嘅奇石同景點,巫氏大宅、蒲台學校等,可以玩嘅地方太多。
由於去蒲台島只能於星期二、四、六、日及公眾假期喺香港仔乘搭街渡,而星期日及公眾假期街渡會去埋赤柱卜公碼頭,所以基本上要去蒲台島幾乎一定要先去香港仔海濱公園。而家多咗港鐵南港島線,只需在黃竹坑落車行15分鐘左右就到,好過坐車喺香港仔隧道塞到人都癲。
蒲台島船票票價:
星期二、星期四及週六(公眾假期外):蒲台島居民港幣17元,非蒲台島居民港幣20元;星期日及公眾假期:蒲台島居民港幣18元,非蒲台島居民即日來回船票港幣40,單程港幣20元;3歲以下小童免費。
靈龜上山石
佛手岩
126燈塔,露營人士大多於呢一帶紮營。
巫氏大宅
長洲
來回香港仔同長洲嘅航線雖然才開咗一年多少少,由於入南區好煩,所以以住只係適合南區一帶朋友使用,其他地區嘅朋友都係用中環方面嘅航線多,不過而家入南區方便咗,不妨考慮下配南區酒店、海洋公園來個2日1夜嘅行程,直接從香港仔過去離島啦!
票價
星期一至五:$30
星期六、日及公眾假期:$32 即日來回票:$50(優惠期至2017年6月23日)
3歲至11歲兒童有半價優惠
南丫島
南丫島同長洲情況相似,都係同中環都同時有航班前往,不過由於南丫島以遊覽嚟講好多時都係榕樹灣入索罟灣走,所以新線理論上係可以解決回程時候嘅「痛苦」(玩完1-3日先塞香港仔隧道…)。當然按時間亦可以配南區酒店、海洋公園來個2日1夜嘅行程。而南丫島本身亦係一條比較輕鬆嘅行山路線,路線大致為南丫島榕樹灣-風采發電站-洪聖爺灣-蘆鬚城泳灘-索罟灣。7公里長嘅路線大致2個幾鐘就行得晒,就算係環島路線,都係需時唔到4個鐘。
環島路線
洪聖爺灣泳灘
索罟灣
榕樹灣大街
南丫風采發電站
票價
香港仔至南丫島 (索罟灣)
香港仔至南丫島(榕樹灣)
中環至南丫島(榕樹灣)