排隊or not排隊？Apple Premium Reseller買機攻略

今日係iPhone 6正式發售嘅日子，唔知各位今朝去咗Apple Store、各大電訊商、連鎖電器舖、還是Apple Premium Reseller(APR)或Apple Authorised Reseller(AAR)買機？大部份商戶都係用預約形式訂機，冇預約嘅一概冇得買。

不論是要返工前拎機、想一早拎咗趁第一日高價即放獲利、還是揀型號要先到先得，即使預約咗，都見到各商戶門口都出現人龍。但仍然有唔少人去某些電器舖或APR門口通宵排隊，希望搏一搏，可以一開門就買到機。當然，需要返工嘅人除非請假，否則都唔會去排。

唔少APR已經係門口貼咗告示，或Facebook專頁宣布，叫大家唔使排隊，因為只會賣俾已經登記咗嘅買家。大家不妨留意下佢哋嘅Facebook專頁。其中有一間今日下晝2點接受登記，雖然未知佢會唔會跟Apple官方價賣，不過想買機嘅朋友都登記咗先，唔好錯過。最後提提大家，如果聽日至10月7號Apple Reserve到去IFC買機，滿$6,000可以免費換KWANPEN蛇皮證件套或多用途蛇皮鑰匙包一個，買完機記得去換。

以下係一啲電器舖同APR嘅買機方法：
豐澤：「易賞錢」會員預約買機 (已截止)，型號先到先揀，正價發售。
百老匯：即將買機，不過價錢比官方價格高，接近炒價。
蘇寧：參加Facebook專頁活動，合資格嘅頭100名可以買機。
Studio A：只限會員登記 (已截止)
Sunion：派籌(已派完)，價錢比官方價格高。
Raakee：今日中午公開發售，價錢比官方價格高，iPhone 6 16GB賣$8,000。另外會員可親臨門市，用200積分即場兌換iPhone 6買機名額一個, 即場買機。
iWorld：冇資料，門口貼咗「詳情請向店員查詢」，店員話：「我都唔清楚。」，引致好多人排隊搏一搏。
Designer Group (DG)：冇資料。
Ultimate PC & Mac Gallery：冇資料，有人排隊。
new vision：今日下晝14:00去官網登記。