抹茶蜜瓜控必去!朗豪i Cremeria Cafe試食報告
抹茶蜜瓜控必去!朗豪i Cremeria Cafe試食報告
相關信用卡:

抹茶蜜瓜控必去!朗豪i Cremeria Cafe試食報告

發表日期: 2016 年 07 月 15 日 更新日期: 2016 年 07 月 15 日 飲食
作者:Yvone 二方

人氣雪糕甜品舖i Cremeria進駐旺角朗豪坊喇!以後除咗去尖沙咀同銅鑼灣,又有多一個地方可以品嚐到日本甜品嘅味道!今次我就為咗大家嘅肚着想,去咗朗豪坊i Cremeria 同大家睇吓實物有冇走樣,同埋係咪真係咁好食先!

i Cremeria Cafe於7月8日喺朗豪坊就開業喇,由朝早10點開到夜晚11點,喺旺角食完晚飯再上去嘆個甜品都仲得啊!以後喺旺角諗下場食咩甜品好又多個好選擇喇。我嗰日就大概下午4點幾去到,都唔算好多人,雖然唔算有好多座位,都好快就搵到位置坐低。現場都見有唔少人係買雪糕然後拎走食,另外佢所有蛋糕都可以外賣,想拎返屋企慢慢嘆亦得!

▲位置唔算有好多,不過我去嗰日都有空位。(圖片來源:i Cremeria Facebook)

第一次來到,當然要睇睇佢個menu先,佢喺cashier旁邊有3大塊menu方便大家睇㗎!見到個menu真係眼花瞭亂,我有好多嘢想食啊!我又想食雪糕啦,又想食刨冰啦,又想食蛋糕啦,又想食蜜瓜啦....(喂,你咁貪心㗎!)你都知女人對甜品冇咩自制能力㗎啦,可惜我得一個胃,最終忍痛揀咗3樣來試,分別係日本直送蜜瓜芭菲、海豹造型芝士蛋糕以及宇治抹茶海綿卷。

 

首先試咗個日本直送蜜瓜芭菲先!呢個芭菲重點一定非蜜瓜莫屬,一眼望落去就見到旁邊有一片蜜瓜,雪糕上亦有蜜瓜粒,再加上高高嘅白色雪糕,賣相好吸引!先試一試個雪糕,都算充滿牛奶味,幾好食的,不過我本身想像中佢會更加重牛奶味,所以有點點嘅失望。


▲日本直送蜜瓜芭菲 $88

再試一試個蜜瓜,質地偏軟,唔係我哋平時會食到「索索」聲那一隻,而且也很甜,唔係糖水嗰隻甜,係蜜瓜本身嗰種喺口腔久久不散嘅甜味。小心食食吓嗰塊側邊嘅蜜瓜冇咗啲雪糕嘅支持會跌落嚟,建議先食少少雪糕(因為較淡味),然後就食咗側邊塊蜜瓜先,再返轉頭慢慢食雪糕。

 


▲片蜜瓜都幾大。

食到中間就發現係粟米片,以為會一路到底都係粟米片,點知我咁諗就錯喇。差唔多食到最底竟然又出現蜜瓜!當食咗咁多雪糕洗走咗蜜瓜陣味之後,又再出現蜜瓜,好邪惡啊!食到最尾一定要飲埋淨低嘅雪糕,因為佢混和咗蜜瓜汁,好好味㗎!不過啲蜜瓜真係好甜,再加埋雪糕,成杯來講我覺得有少少太甜。


▲中層嘅粟米片。

食完個芭菲,第二樣我選擇試咗個海豹造型芝士蛋糕,呢個係旺角朗豪坊店限定㗎!淨係睇個外型已經夠吸引,一個黃色嘅蛋糕用cream同朱古力醬唧成海豹嘅五官,蛋糕仲用cream圍住,睇落就好似海豹仔喺海面游緊水咁。


▲海豹造型芝士蛋糕$58。好似有啲走樣,啲cream原本係扮佢個嘴,我仲以為係隻手。
 

一切落去,咁軟嘅?原來係幕絲質地嘅芝士蛋糕,切開咗睇仲有啲似芒果蛋糕。食落去係好重芝士味,但一啲都唔膩,個味道都似係加咗好多cream落去,所以除咗芝士味,仲有奶香味。加上佢係慕絲質地,個餅底都係海棉蛋糕,唔覺唔覺就好易食晒。睇番佢哋官網介紹話係用白朱古力包住,不過我就唔係好食得出有好重朱古力味,可能個芝士味太出了。


到最後梗係要試吓抹茶啦~我就揀咗宇治抹茶海綿卷。自從喺日本旅行完返來,我就對中間空心有一大舊cream嘅蛋糕情有獨鍾,因為我本身好鍾意食cream,如果中間舊cream好食,食完成個人都會勁滿足。見到佢有個睇落好似咁多cream嘅海綿卷,我當然唔會放過啦,而且呢個海綿卷都係朗豪坊限定㗎!


▲宇治抹茶海綿卷$38。

就咁睇已經覺得啲cream好多,點知一切落去啲cream瀉晒出來,好澎湃!先講講個蛋糕外層,有綠茶嘅香味,近外部嘅位置(即係近啡色皮嗰度),仲食到有蛋味,質地夠軟,合格!再仔細啲睇個cream,就會發現個cream入面有紅豆,紅豆永遠都係綠茶嘅好拍擋,除咗可以互相襯托個味道之外,紅豆仲可以令成個口感更豐富,唔會淨係得軟綿綿嘅質感。個cream嘅味道我亦都好鍾意,唔會係好甜嗰隻,本身個綠茶嗰陣清香就更出喇!而且cream嘅質哋幼滑,值得一試!


▲啲cream超澎湃!絕無欺場!

嗱!其實間cafe仲有好多嘢食,有啲仲好霸氣㖭!等我介紹吓其他嘢食啦!霸氣之選一定係呢個日本直送Delux蜜瓜芭菲!有成半個日本直送蜜瓜,鍾意蜜瓜嘅朋友一定唔可以錯過!幾個朋友約埋去食就好啲,自己食半個蜜瓜都幾飽。


▲日本直送Delux蜜瓜芭菲$220。(圖片來源:i Cremeria Facebook)

除咗霸氣蜜瓜之外,仲有手工藝術蛋糕,而且係每日限量供應!想食嘅朋友可能要早啲去或者book定喇!

▲玫瑰花紅桑子蛋糕 $980。由糖花藝術師用了10小時手製的玫瑰花配上優質伯爵茶雪芳、清新低糖紅桑莓慕絲以及日本輕盈忌廉。每日限量供應。(圖片來源:i Cremeria Facebook)


▲日本溫室蜜瓜汁$68。(日本溫室蜜瓜片+$20)(圖片來源:i Cremeria Facebook)


▲夏日之選-冰!高知県 莓冰り $83。(圖片來源:i Cremeria Facebook)


▲除咗散件咁叫,仲可以一個tea set咁叫。(圖片來源:i Cremeria Facebook)
 

I Cremeria Cafe除咗收現金八達通,仲接收Visa、Master、銀聯簽賬。由2016年7月15日至9月14日,憑渣打/MANHATTAN信用卡於本地,海外零售簽賬及網上簽賬滿指定金額,當中全港食肆簽賬可享回贈:

累積任何合資格簽賬(該階段):HK$20,000 或以上
當中合資格本地食肆簽賬之現金回贈#比率:18%
最高現金回贈(該階段):HK$480
最高現金回贈(整個推廣期):HK$960

累積任何合資格簽賬(該階段):HK$10,000-$19,999
當中合資格本地食肆簽賬之現金回贈#比率:8%
最高現金回贈(該階段):HK$240
最高現金回贈(整個推廣期):HK$480

累積任何合資格簽賬(該階段):HK$5,000-$9,999
當中合資格本地食肆簽賬之現金回贈#比率:8%
最高現金回贈(該階段):HK$120
最高現金回贈(整個推廣期):HK$240

推廣期
階段1:2016年7月15日至8月14日
階段2:2016年8月15日至9月14日


以今次為例,消費共$184。
情況一:累積任何合資格簽賬(該階段):HK$20,000 或以上
食肆簽賬之現金回贈#比率:18%
咁今次嘅消費就會有$33.12嘅回贈。

情況二:累積任何合資格簽賬(該階段):HK$5,000-$9,999
食肆簽賬之現金回贈#比率:8%
咁今次嘅消費就會有$14.72嘅回贈。

信用卡優惠詳情可以去呢度睇