必食泰國皇室料理 Blue Elephant登陸海港城

泰國皇室宮廷料理Blue Elephant 藍象餐廳係港人去泰國必食嘅知名食府之一，創辦人 Nooror Somany 被泰國政府譽為「泰國美食大使」、「泰國65名最具影響力女士之一」，仲有「皇家御廚」的盛名，餐廳仲被選為「曼谷50家最頂級餐廳之一」，得到過無數榮譽同獎狀，大有來頭。Blue Elephant 於比利時布魯塞爾、曼谷、布吉、倫敦、杜拜、巴黎同哥本哈根等世界各地都有分店，名氣遍及全球。於3月登陸海港城嘅香港店 Thai Brassiere by Blue Elephant就係全球第12間分店，同時係大中華區首間分店。而家大家唔使再去泰國先食到地道泰國宮廷滋味喇！

必食名菜
1.招牌冬蔭公(＄78/一位；＄168/二至三位)

冬蔭公係Blue Elephant招牌菜，幾乎每個食客都會點！餐廳堅持採用泰國新鮮運抵嘅原材料熬煮湯底，包括檸檬葉、香茅、青檸汁、辣椒等泰國香料，過程中絕無添加鹽及味精。當中重點係爆膏泰國河蝦，超大隻而且勁多蝦膏，好鮮甜；冬蔭公辛辣鮮香，味道極有層次感。餐廳對冬蔭公嘅溫度控制好講究，由烹調至上檯間都必需保持於80至90度之間，用陶瓷盛器奉上，感覺與別不同，充滿皇家風格。

2.香港店特有！暖心榴槤撻(＄98)

用泰國榴槤肉， 混合Mascarpone Cheese、Cream Chesse 及Ricotta Cheese三種芝士焗製而成，質感軟滑、甜而不膩。撻上脆片用榴槤肉烘成，為整道甜品增加口感。

 

3.經典美味！燒大蝦炒金邊粉(＄148)

用上創辦人Nooror Somany自家調製嘅秘密配方炮製金邊粉同醬汁，加上泰國豆腐乾、芽菜和香葱炒香，配以海鹽炭燒泰國河蝦，甜、酸、鹹、辣共冶一爐，惹味香口。

 

4.蟹肉米紙卷(＄98)

食完濃味菜色如果想食返Fresh少少，一定要點蟹肉米紙卷。透薄煙韌嘅米紙卷包住新鮮肉蟹、泰國芫荽、中國芫荽、羅勒葉同新鮮蔬菜，清新爽口。記得配搭羅望子汁或泰式酸辣汁，可以開胃解膩。

 

極有心思！17米長手繪壁畫

Blue Elephant 香港店用深藍色作為主調，裝潢古典、現代兼備。由泰國知名室內設計公司 August Design Consultant首席設計師 SUEBSKUL LACHAROJ 操刀。走廊上有塊17米長、2.5米高嘅全人手繪製壁畫，由設計團隊耗時三個月繪製，極有心思！壁畫描繪泰國古代嘅民生百態，出現好多象徵泰國嘅事物，令人目不暇給。
 

保留總店特色！Blue Elephant自家餐具

香港店用嘅都係Blue Elephant自家品牌餐具、碗碟，好有氣派，處處都體現到皇家料理嘅精緻同用心。

 

Thai Brassiere by Blue Elephant
地址：尖沙咀廣東道17號海港城港威商場3樓3303號舖
電話：2328 2328
營業時間：星期一至日 11:00am-4:30pm、6:00pm-10:30pm