幾千萬買樓送阿媽 猴年圈中孝順仔原來係⋯⋯

幾千萬買樓送阿媽 猴年圈中孝順仔原來係⋯⋯

相關信用卡:

幾千萬買樓送阿媽 猴年圈中孝順仔原來係⋯⋯

發表日期: 2017 年 01 月 30 日 更新日期: 2017 年 01 月 30 日 生活

作者:甦師父

雞年啱啱到,猴年啱啱過,今年樓價會唔會回落?你問真嘅蘇師父好過啦!去年娛樂圈唔少明星唔怕樓價貴,買磚頭,仲有人豪花幾千萬買樓送畀阿媽添,成為猴年圈中孝順仔之首。佢係邊個?

王祖藍三千幾萬買樓送阿媽

有睇過筆者《不需靠父幹 三大屋邨令你風生水起》一blog嘅讀者會知道,王祖藍喺風水屋邨、馬鞍山恆安邨長大。佢演藝事業起飛後,紅到返大陸,近年做埋老闆,仲話依家忙到好似樂易玲咁,晚晚電話多到輪街症咁款。發咗達不忘TVB,果然識do!

王祖藍發咗達之後,就頻頻買磚頭,繼舊年花1.14億買咗大埔逸瓏灣頂樓連天台複式單位送畀老婆李亞男之後,就送樓畀屋企人,舊年8月先用3,700幾萬買同屋苑單位送畀阿媽,去年尾再送個800萬單位畀細妹。唔計外表,無可否認王祖藍係圈中好男人,依家送樓畀阿媽同細妹,一家同住逸瓏灣,孝順成咁,當選猴年圈中孝順仔第一位,實至名歸啦!

▼王祖藍演藝事業同生意風生水起,最近仲送埋樓畀阿媽同細妹,筆者都想要個契哥

▼高度絕對唔係佢哋兩公婆嘅障礙

▼王祖藍對逸瓏灣情有獨鍾

馬明買樓了心事

冇乜戀情消息傳出嘅馬國明公認係圈中筍盤兼孝順仔,睇嚟仲好識買樓巿筍盤添。

舊年馬明同無綫續咗約之後,心情當堂定過抬炸彈,終於買樓,細屋搬大屋,由同屋企人住嘅太古城900幾呎單位,一齊搬到同屋苑過千呎嘅頂樓特色戶。錢當然由馬明畀啦,成1,960萬架,實用呎價$18,738,比同類單位實用呎價吓吓過$20,000低,算係依家嘅筍盤,而舊居則會由家人放租。

查實佢話買樓已經講咗好幾年,只係一直睇唔啱,依家買到,算係了咗件心事。無綫依家一綫演員人才荒,馬明成功續約,嚟緊唔怕冇劇拍,就算供多層送畀屋企人,都冇問題啦。

▼恭喜你呀馬明,你做業主喇

▼馬明買咗太古城一個頂樓特色戶,同屋企人一齊住

坤哥想盡孝 買樓有心未有力

單親家庭長大、「屋邨仔」出身的吳業坤前年憑《原來她不夠愛我》跑出,變成唔少K迷飲歌,仲連續兩件拎叱咤樂壇我最喜愛的男歌手等樂壇獎項,有傳過去半年拍電影同廣告等,已穩袋7位數收入,應該有能力買樓孝敬吓媽咪掛?

不過盡孝心都要使錢使得精明,細個窮慣、慳慣嘅坤哥接受傳媒訪問時話,正在認真睇樓,預算買400幾萬樓,睇過樓盤都係黃大仙或附近,好似天馬苑、翠竹花園,同埋淘大花園呢啲,打算同屋企人住。

▼蛋糕就唔值幾錢嘅,喂坤哥,近排好紅啦,幾時買樓先?

猴年娛樂圈中買樓送畀父母嘅孝順仔,王祖藍出晒位。馬明買樓同屋企人住,而且公認孝順,排第二,眾望所歸啦。至於坤哥,雖然未真係買樓,但儲多個錢,等樓價跌返啲再出擊,同屋企做有殼蝸牛,做法正路吖。

其實圈中孝順仔點止咁少,好似長駐內地拍劇嘅陳偉霆,拍劇賺大錢,前年就豪花2,700萬買北角半山柏傲山過千呎單位送畀阿媽。佢接受傳媒訪問時就話,習慣一搵到錢就買磚頭,而送畀阿媽嘅呢層樓,佢想住就住,唔住就會放租。不過買樓係前年嘅事,唔入圍做猴年圈中孝順仔。

雞年啱啱至開始,今年又會有乜明星買樓送畀父母咁孝順?你估我真係蘇師父咩?不過在此強調,孝唔孝順唔係用錢嚟衡量嘅,送禮物嘅嘢,量力而為,唔使父母擔心,人人都可以係孝順仔女。