幾十蚊一大樽！平價保濕品檢閱

最近有說日本網民大推BB油，話BB油又平又潤膚又保濕，仲有好多其他用途，可以話係平價萬用品。其實市面上仲有唔少呢啲又平又多用途嘅保濕用品㗎！我哋一齊睇吓啦！

首先我哋睇吓點解BB油咁萬能先。BB油嘅成份好簡單，就係礦物油(Mineral Oil)，佢可以喺皮膚上面形成一層油膜防止身體嘅水份流失，所以做到保濕嘅效果。因為佢嘅原理係防止水份流失，所以應該喺沖完涼，身體仲係濕潤嘅時候搽上，等身體嘅水份走唔到。亦都因為佢成份係油嘅關係，所以可以用來卸除油溶性嘅化妝品。

另外一個早排被日本網民大推嘅就係NIVEA藍罐潤膚霜。呢隻潤膚霜含有甘油(glycerin)為成份，甘油嘅化學公式有3個-OH，所以能夠溶於水而且有吸水嘅特性，用喺身體上面就會有潤滑同保持皮膚濕潤嘅作用。佢都有羊毛脂醇(Lanolin Alcohol)，有滋潤皮膚嘅作用。呢罐潤膚霜全身都可以用，之前就瘋傳厚搽佢上面然後洗走佢，當保濕面膜用。不過佢質地比較杰，如果當面霜用就笠咗少少，搽喺其他位置就唔怕喇。

凡士林(Vaseline)可以話係每個屋企都會有嘅嘢，有咩用？仲停留喺幫BB仔探熱嘅年代？其實凡士林有好多意想唔到嘅用途！凡士林嘅成份亦都好簡單，主要係礦物脂(Petrolatum)，係由石油提煉而成，可以喺身體上形成保護膜，幫助鎖緊水份。其實有好多護膚品都會有呢種成份，凡士林都可以歷久不衰咁耐，原因就係成份冇咩其他添加，大多數人都啱用。有唔少人對石油提煉都好抗拒，覺得唔天然好易敏感。事實上礦物脂係隋性物質，意思即係唔容易會起反應，就算敏感皮膚用petroleum jelly都係冇問題嘅。

上凡士林嘅官網度睇，佢嘅成份係100%純petroleum jelly，但我睇睇自己手上喺香港買嘅，發現除咗petroleum jelly，佢仲加入咗維他命E同埋BHT。BHT(Butylated hydroxytoluene)係一種加入化妝護膚品嘅抗氧化劑，添加過量可能會引起過敏。如果想要冇BHT成份嘅，睇來要去買美國版喇！

除咗探熱之外，凡士林仲可以咁樣用：
－搽喺乾燥嘅皮膚（如手肘腳肘）預防乾裂
－晚上厚塗喺嘴唇，第二朝嘴唇就會好軟好易上唇膏
－搽指甲油時可以搽少少凡士林喺指甲邊，就算搽咗出界都好容易清除
－染髮時亦可搽少少喺髮際邊緣，亦都會令染髮劑冇咁易沾染到皮膚
－太耐冇戴耳環亦都可以搽少少喺耳針度，咁就會戴得順滑一點
－咁熱天氣出街溶妝變熊貓眼，都可以用棉花棒沾少少凡士林抹走溶咗嘅化妝品 （潤唇膏都有同一個用途呢）

最後一個可能少啲人知，就係Aqueous cream，亦有人叫佢做冷霜或者雪花膏。見到佢個名叫aqueous，就會諗到佢質地比較多水份，亦都比較稀，適合啲想保濕但又怕搽油性質哋嘢嘅人，可以按需要一日搽一次或更多。之前有指搽aqueous cream可能會引致敏感，元兇可能係sodium lauryl sulfate（SLS），佢係一個穏定劑同埋清潔劑，有機會會刺激皮膚，所以依家都會建議出現敏感反應嘅人用冇SLS嘅配方。

除咗可以搽之外，喺皮膚乾燥嘅時候仲可以將aqueous cream當洗面膏或肥皂咁用。

總結：

提提大家，用新護膚品化妝品前，記得睇吓自己有冇敏感。可以喺手背或者手臂內側搽上少量產品，睇吓有冇過敏反應，如果有就唔好用喇！

如果習慣去連鎖個人護理用品店買個人護理用品，可以用以下信用卡：
用恒生enJoy卡，每月1號以及20號去萬寧消費都有95折。
由即日起至2016年6月30日，以DBS COMPASS VISA於指定類別簽賬（包括於屈臣氏、萬寧、759KAWAIILAND消費），可享5X COMPASS Dollar。