一年容易又過去，2017即將成為歷史，之前兩年都有信用卡大事回顧，今年亦唔例外。
新卡推出
今年都有唔少新卡推出，當中Citibank同渣打兩間銀行分別推出主打現金回贈嘅新Visa Signature信用卡，Citi Cash Back Visa基本回贈1%，主打酒店、食肆、海外及網上外幣簽賬2%回贈。渣打Simply Cash Visa 卡就有直版卡面設計，基本回贈1.5%，外幣簽賬2%回贈。
當初兩張卡嘅迎新回贈都算高額，Citi Cash Back Visa簽$15,000有$1,500回贈，渣打Simply Cash Visa 卡就係100%回贈，簽$1,000回$1,000。
Citi Cash Back Visa卡面設計，信用卡號碼印喺卡背。
除咗有直版設計，渣打仲搵咗周柏豪同楊丞琳拍廣告，分別針對香港同台灣市場。
另外，建行(亞洲)銀聯鑽石Prestige信用卡係呢個級別嘅第一張，佢比銀聯鑽石卡更高級，優惠亦有升級，特別係入機場貴賓室不限次數 (每日一次)，唔需要事前預約，同埋每年簽賬指定金額，會送免費旅遊獎賞。不過呢張卡冇公開申請，要獲邀人士先可以申請，聽聞有部分現有建行(亞洲)信用卡卡主都有收到出卡或升級邀請。
其他新信用卡仲有：
DBS Eminent Platinum Card
－主要優惠同Visa Signature版差不多，本地1%回贈、外幣2%回贈、本地食肆1.2%回贈。不過年薪要求低啲，比較易申請。
安信WeWa銀聯鑽石卡
－主要優惠同原本WeWa卡一樣。
安信星旅鑽石卡
－香港中旅社簽賬5%回贈，基本0.4%回贈，指定旅遊商戶折扣優惠。
建行(亞洲)AIA銀聯鑽石信用卡
－買新保單或續保保單可以6/9/12/18個月分期付款。簽$1賺1分，8分=1里。
工銀亞洲銀聯雙幣鑽石卡
－內置深圳通，可以搭深圳地鐵同市內指定巴士、支援銀聯閃付拍卡付款。簽$1賺1分，8分=1里。
中銀中國移動香港銀聯鑽石卡
－中國移動香港簽賬3X積分、網上增值國移動香港儲值卡多送5%額外增值額、指定類別簽賬95折。簽$1賺1分，15分=1里。
中銀東航雙幣信用卡
－憑卡經東航香港營業部售票處購買指定套票，免費送12個月「東方萬里行」銀卡會籍、經官網買香港出發指定航線及艙位機票，票價95折﹑送額外行李重量同免費改期優惠一次。簽$1賺1分，8分自動兌換「東方萬里行」=1里。
AEON ONE PIECE萬事達卡
－著名漫畫《ONE PIECE》卡面設計，暫時有路飛同索柏。
電子錢包P2P轉賬賺分
上年八達通「好易畀」、WeChat Pay開始咗電子錢包P2P轉賬呢個賺分方式，今年2月滙豐推出嘅PayMe、同支付寶HK10月推出P2P轉賬功能，更加將呢個玩法推到高峰。
滙豐PayMe直接過數俾人係幾方便，不過唔少人其實係用嚟賺分。
當然，銀行亦知道咁樣係白白送分出去，所以有唔少銀行都視電子錢包增值/轉賬為不合資格交易，例如滙豐就喺今年4月起，喺條款加入充值電子錢包冇得賺「奬賞錢」呢一項；中銀亦喺11月起、將P2P現金轉賬、連同特定類別簽賬，限制每月結單積分上限為10,000分。而滙豐7月尾向PayMe用戶發電郵，指因有少部分用戶透過PayMe賺信用卡積分，因此由8月開始，將PayMe每月增值額由$10,000減到$5,000。
Samsung Pay出場
4月尾，Samsung喺香港推出Samsung Pay，最特別係除咗支援NFC，亦支援MST (Magnetic Secure Transmission)，即係可以將手機放埋去磁帶卡槽感應當碌卡。今個月初，Samsung Pay同 八達通合作，可以加八達通卡入Samsung Pay，喺電話用Smart Octopus俾錢。
Samsung Pay支援MST，拍落磁帶卡槽模擬碌卡，即使舖頭冇裝感應式卡機亦可用。
美國運通開新機場Lounge
要入香港機場貴賓室，可以用指定信用卡或Priority Pass，美國運通都係今年10月喺香港機場開咗亞洲首個The Centurion Lounge，美國運通白金卡同Centurion Card都可以免費入Lounge，部分服務就係Centurion Card獨享。同時，原本要受邀請人士先可以申請嘅白金卡，亦都開放申請。
The Centurion Lounge雖然唔算好大，但酒吧有著名調酒師Jim Meehan精心調配嘅特色雞尾酒，同埋葡萄酒權威Anthony Giglio挑選嘅紅酒。
行車隧道拍卡收費
上年政府推出停車位拍卡入錶功能，今年進展到行車隧道，城門隧道、香港仔隧道同紅隧分別喺7月、9月同12月陸續提供「停車拍卡」，用八達通或感應式信用卡 (Visa payWave、MasterCard Contactless、銀聯閃付) 俾隧道費，日常生活又多一個途徑賺信用卡積分。
優惠條款更改
唔少信用卡都有喺今年更改條款，另外亦有部分將會係2018年生效，普遍都係削減或加咗簽賬要求。
| 2017信用卡條款更改 | ||
| 銀行 | 原有條款 | 更改條款 |
| 東亞 | i-Titanium卡網上購物交易3% i-Dollar回贈 | 每月累積簽賬$1,800，該月網上購物交易3% i-Dollar回贈 (1/1生效) |
| 繳費及八達通自動增值1.6X分，$5=1里 | 1X積分，$8=1里 (7/1生效) | |
| i-Coupon換領計劃 | 於2017年12月14日完結 | |
| 富邦 | 白金卡/Titanium卡 20000分 = $100 回贈 | 22000分 = $100回贈 (3月起) |
| 信銀國際 | motion卡網上簽賬5.55%回贈 | 0.55%回贈 (1/1生效) |
| motion卡拍卡交易5.55%回贈 | 每月累積簽賬$3,000，拍卡交易5%回贈 (1/1生效) | |
| 滙豐 | 充值電子錢包可獲「獎賞錢」 | 不獲「獎賞錢」 (4/1生效) |
| PayMe每月增值額$10,000 | 每月增值額$5,000 (8月起) | |
| 星展 | DBS Eminent Card基本0.4%回贈，網上及海外6%回贈 | 本地1%、外幣2%、本地食肆1.2%回贈 (3/15生效) |
| 大新 | 跨境港幣交易手續費0.8% | 1% (7/1生效) |
| 建行(亞洲) | Visa卡跨境港幣交易手續費0.8% | 1% (7/1生效) |
| eye卡商戶免息分期供款5X積分 | 1X積分 (7/1生效) | |
| Citibank | Citi Prestige卡可免費使用Citi機場貴賓室 | 於2017年3月14日終止 |
| 美國運通 | Blue Cash信用卡本地及海外1%回贈 | 1.2% (6/1生效) |
| I.T Cashback卡本地及海外1%回贈 | 1.2% (6/1生效) | |
| 已知2018條款變動 | ||
| 中銀 | 繳費、八達通自動增值、超市、便利店及政府部門簽賬，每結單月合共最多可獲10,000分 | 加入P2P轉賬、食品雜貨店、 各類食品店、專門食品零售店 (2018/1/3生效) |
| 美國運通 | 白金卡「饌賞集」優惠 | 於2018年1月1日終止 |
| Blue Cash信用卡關牛角日本燒肉專門店7折 | 於2018年1月1日終止 | |
| 百老匯、PALACE和AMC戲院優惠 | 將設不適用日期，亦不適宜於$35或以下戲票、星期二及「早場」 | |
| 星展 | DBS Eminent Card及白金卡跨境港幣交易可獲DBS$ | 不獲DBS$ (2018/1/3生效) |
| 全港食肆簽賬3X DBS$ | 於2018年1月3日終止 (不包括指定信用卡) | |
| 兌換里數手續費最低$50最高$300 | 最低$100不設上限 (2018/1/3生效) | |
| 滙豐 | 「最紅自主獎賞」 | 2018/1/1-12/31 |
以上就係今年嘅信用卡大事回顧，唔知有邊啲都係各位心目中嘅大事呢？喺度祝大家喺2018年繼續賺盡里數、回贈！