轉眼間2016即將成為歷史,每逢年尾,總有全年大事回顧系列。喺呢度自然要講下今年同信用卡相關嘅事件,作為總結。
新卡一籮籮
今年出咗唔少新卡,我數到嘅當中最矚目嘅要數渣打亞洲萬里通萬事達卡,呢張正式同Asia Miles合作嘅聯營卡,一嚟就用$0.5=1里數迎新嚟吸客,的確係幾吸引。同埋呢張卡喺本地食肆$4=1里數,喺滙豐取消咗「最紅星期五」11X「獎賞錢」,同改咗$1「獎賞錢」換10里數之後,呢張就成為儲里數人士嘅食飯卡之選。
搵埋鄭秀文做代言人,認真揼本。
另外,最得女士歡心嘅,應該係富邦「一田 X 熊本県」• Titanium卡,佢用咗熊本熊做主題,卡面印住部長個樣,迎新禮物送KUMAMON版多士爐同旅行套裝,真係Fans必出卡。
呢張「黑卡」超正。
至於其他新信用卡仲有:
美國運通 I.T Cashback卡
-1%現金回贈,I.T買衫有折。
建行(亞洲)食通街信用卡
-食肆3X積分,指定食肆1折優惠
建行(亞洲)香港航空Fly Away信用卡
-海外簽賬、香港航空簽賬$4=1金鵬積分,每年免費入香港航空機場貴賓室「紫荊堂」5次。
安信WeWa信用卡
-旅遊、戲院、卡拉OK、主題公園類別4%現金回贈。
東亞銀行Visa Signature卡
-本地食肆簽賬6X積分、海外簽賬4X積分,但冇得換里數。
中銀旅遊賞Visa Signature卡
-海外簽賬8%額外現金回贈
ICBC AXA安盛白金卡
-交保費都有分,交AXA安盛保險保費$1=1分。
常設優惠縮水
優惠縮水似乎都係一個趨勢,例如調低積分換里數比率,又或者優惠照舊但提高門欖,獎賞愈來愈難賺。雖然有啲卡都有優惠改良,或者加咗啲新優惠,但普遍都有門欖,唔算易賺。
電子錢包大戰
今年可以講係電子錢包年,皆因Apple Pay同Android Pay分別係7月同10月正式登陸香港,合作銀行都有出相關優惠,而且因應返電子錢包嘅特性,通常係去超市、便利店、快餐店買嘢,金額唔會太高,優惠簽賬要求一般都比較低,都幾易賺,所以好多人都第一時間試用 / 試賺。
Apple Pay交易時要用Touch ID做指紋認證,Android Pay就唔使,有人就認為Apple Pay比較安全,大家又點睇?
P2P過數賺積分
有啲電子錢包加入咗P2P轉賬功能,例如八達通「好易畀」、WeChat Pay,可以喺手機直接過數畀其他人,又或者入返落銀行戶口套現;同時可以用信用卡過數 / 增值入電子錢包戶口,於是就有人諗到用呢個途徑嚟賺信用卡積分或里數。不過呢個方法要日日重複過數動作,其實都幾煩,相信只有對積分或里數極為渴求嘅人士先會考慮。
月結單收費
雖然唔少人都有用ebanking,不過總覺得收印刷版月結單比較實在,又可以提醒自己還卡數。有銀行發月結單開始要收費,例如Citibank喺2月就開始要收$20,恒生、DBS都話2017年會開始收費,喺環保同埋銀行開源節流嘅大趨勢下,月結單收費支付無可避免。
自動取消長時間未啟動信用卡
有時申請信用卡,銀行會侷你開埋一啲你唔想要 / 唔需要嘅卡,即使唔啟動嗰張卡,其實戶口仍然存在。今年1月實施嘅《銀行營運守則》,如果張卡喺18個月內唔啟動,銀行就會通知客戶要喺30日內開卡同簽卡,如果都係冇,就會自動Cut卡。呢個方案最啱一啲唔想主動打電話Cut卡嘅人,不過如果張卡真係唔啱用,最好都係打返上CS要求Cut卡。
入咪錶可拍卡
今年10月,運輸署係元朗同旺角推出支援Visa payWave、MasterCard Contactless同銀聯閃付 (暫時仲未支援Android Pay同Apple Pay) 嘅泊車咪表做試驗,嚟緊第二季灣仔同西貢亦會加入,如果試驗效果理想,就會陸續更換全港泊車咪表,到時又多一個日常生活支出可以儲積分。
好喇,以上就係我所揀嘅2016信用卡事件回顧,大家又對邊啲印象深刻啲呢?在此謹祝各位新年快樂,身體健康,2017繼續勁賺信用卡獎賞。