平過日本買!香港抵買日本藥妝攻略

平過日本買!香港抵買日本藥妝攻略

相關信用卡:

平過日本買!香港抵買日本藥妝攻略

發表日期: 2016 年 07 月 14 日 更新日期: 2016 年 07 月 14 日 購物

作者:Yvone 二方

近排日元真係好強勢,去日本立即變貴咗。不過女仔對日本藥妝真係情有獨鍾,依家去日本咁貴,去掃貨未必着數。其實香港都有唔少日本藥妝賣,喺咁嘅時勢,留喺香港買分分鐘抵過去日本入貨!今次就揀咗幾款喺香港抵買嘅日本藥妝,等大家可以喺香港頂住條買藥妝嘅癮先啦!

Kanebo suisai酵素洗顏粉

▲計番港幣要成$160。

呢隻洗顏粉近排好多人都講緊,係大熱嘅item,好多人都話洗得好乾淨。Kanebo呢隻洗顏分有2種酵素同埋配合咗保濕成份。
呢個產品有蛋白酶(Protease)及脂酶(Lipase),Protease即係分解蛋白嘅酵素,而lipase就係分解脂肪嘅酵素,可以幫助分解面上嘅污糟嘢。仲有甘草次酸做成份,有抗炎、鎮靜舒緩嘅效果。佢仲配合咗乳酸、豆乳發酵液做保濕,所以唔少人都話洗完唔會好乾。

鍾意用呢隻洗顏粉嘅朋友要注意喇!睇番官網,佢話呢隻產品只係生產到2016年9月,各位可能要入多啲貨慢慢用喇!

▲Sasa網上個價就平過真係落舖買喇!


毛穴撫子重曹泡洗顔

▲計番港幣要$80。

毛穴撫子呢個系列係專門解決毛孔粗大、士多啤梨鼻嘅問題。呢隻洗面膏嘅重點就係「重曹」,重曹即係碳酸氫鈉(Sodium hydrogen carbonate),碳酸氫鈉亦都係我哋認知嘅梳打粉成份,佢有一個清潔嘅效果,坊間亦有傳用梳打粉可以洗除黑頭呢!除咗碳酸氫鈉,佢都有配合保濕成份如水解骨膠原、透明質酸及蜂蜜等成份

▲喺香港買即刻平咗唔少。

Anessa防曬

▲計番港幣要$250。

Anessa防曬都興咗好一段日子,不過早排見佢正式登陸咗香港有得賣,咁就唔使下下飛到日本買啦!點解咁受歡迎呢?睇番佢個產品簡介,原來佢有一個「アクアブースター技術」(Aqua Booster技術),令防曬成份接觸到水份或汗水時,會形成一個可以防UV嘅薄膜。佢原理係防曬成份入面嘅負離子同汗水入面嘅正離子互相吸引,形成一層薄膜。不過我覺得大量流汗都係應該會沖擦走咗啲防曬,所以佢產品介紹度都提番大家大量流汗或者抹過都要補搽防曬。

除咗防曬成份之外,佢仲有保補成份「ヒアルロン酸GL」,即係透明質酸(hyaluronic acid)同埋甘油(glycerin),等皮膚受到日曬都冇咁乾。呢隻防曬有SPF50+ PA++++,而且普通肥皂就可以清潔到啲防曬,好方便啊~

▲慳唔少,得咗。

藥用雪肌精乳液

▲轉做港幣要成$400。

雪肌精呢個名相信大家都唔會陌生,以往yen平時去日本買可能會抵少少,不過依家啲yen咁貴,留返喺香港買仲抵呀!呢支藥用雪肌精乳液係支藥用嘅美白乳液,再配合埋植物嘅成份如金縷梅及牡丹做保濕嘅效果。除咗植物成份,佢都有維他命C做美白嘅功用以及甘油做保濕滋潤嘅作用。

▲香港官網已經平過日元價。

▲再搵吓仲有得平。

LULULUN面膜

▲其實本身日本買都唔貴,大約$25。

好多人都知道LULULUN面膜係去日本必買item,其實香港都有得買,而且價錢未必會輸。LULULUN面膜有透明質酸、蜂蜜、蘆薈以及牛油果抽取物作為保濕,亦有ceramide調整肌膚。Ceramide可以幫助皮膚修復屏障,幫助改善乾躁嘅情況。另外亦有PCA-Na作為保濕因子。

▲不過香港再平多少少。


除咗護膚品,我仲發現有啲開架化妝品牌喺香港嘅價錢平過個日元定價喇終於!

首先係D UP雙眼皮膠紙,佢賣點係整型級嘅雙眼皮膠紙,其實只係因為佢係雙面都有粘性,咁隻眼就會再大啲同埋睇唔到膠紙嘅痕跡。另外佢都有單面嘅款式。佢定價係1000yen120塊,計返都要$77,但依家喺莎莎賣緊$68,賺咗!

仲有就係發現media呢個品牌有啲產品依家喺香港買係抵啲!Media呢個品牌大家都唔會陌生,佢都出唔少底妝產品㗎,而且效果都唔錯。我行街嘅時候就發現佢隻乾粉餅同保濕粉底霜日元定價都要$1,100未連稅,換返港紙都要大約$85仲未計稅,不過我就發現個粉餅賣緊$80,個粉底霜就$77。點睇都香港買抵啲喎!

最後同大家總結一下以上貨品抵咗幾多:

匯率以1港元對0.07716日元計算。


由即日至2017年3月14日,客戶憑建行(亞洲)信用卡於網上購物簽賬可享3X積分(包括Sasa.com)。